ରାଜ୍ୟ ବଡ଼ ନା ପରିବାର ବଡ଼ ?
ମନ୍ତ୍ରୀ ବଡ଼ ନା ପୁଅ ବଡ଼ ?
କାହା ସୁରକ୍ଷା ପାଇଁ ପିଏସ୍‌ଓ ?
 

ଅର୍ଗସ ବ୍ୟୁରୋ : ପୁଣି ଚର୍ଚ୍ଚାରେ ଆଠଗଡ଼ ବିଧାୟକ ତଥା କୃଷିମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ । ବିଧାୟକ ବା ନିର୍ବାଚିତ ଜନପ୍ରତିନିଧିଙ୍କର ସୁରକ୍ଷାକୁ ନେଇ ପୁଣି ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି ଆଠଗଡ଼ ବିଧାୟକ । ନିର୍ବାଚିତ ବିଧାୟକଙ୍କ ପାଇଁ ସରକାରଙ୍କ ପକ୍ଷରୁ ନିଯୁକ୍ତ ହୋଇଛନ୍ତି ବ୍ୟକ୍ତିଗତ ସୁରକ୍ଷା କର୍ମୀ ବା ପିଏସଓ । ହେଲେ ସେମାନେ କାହାକୁ ସୁରକ୍ଷା ଦେଉଛନ୍ତି ତାହାକୁ ନେଇ ଚର୍ଚ୍ଚା । ଚର୍ଚ୍ଚା ଏଇଥି ପାଇଁ ହେଲା ଯେତେବେଳେ ସରକାରୀ ନିୟମକୁ ଖାତିର ନକରି ବାପାଙ୍କ ବଦଳରେ ପୁଅକୁ ସୁରକ୍ଷା ଦେଲେ ସୁରକ୍ଷାକର୍ମୀ ।

ଆଜି ପାଳନ ହେଉଥିଲା ବିଜେଡିର ପ୍ରତିଷ୍ଠା ଦିବସ । ଏହି ଅବସରରେ ଆଜି ତିଗିରିଆରେ ପାଳନ ହେଉଥିଲା ବିଜେଡିର ପ୍ରତିଷ୍ଠା ଦିବସ । ଆଠଗଡ଼ ବିଧାୟକ ତଥା ମନ୍ତ୍ରୀ ରାଜା ସ୍ବାଇଁଙ୍କର ଦେଖା ତ ନଥିଲା । କିନ୍ତୁ କାରରେ ଆସିଥିଲେ ତାଙ୍କ ପୁଅ ଆଦିତ୍ୟ ପ୍ରତାପ ସ୍ବାଇଁ । ଏମିତି ସମୟରେ ମନ୍ତ୍ରୀଙ୍କ ବ୍ୟକ୍ତିଗତ ସୁରକ୍ଷା କର୍ମୀଙ୍କୁ ଦେଖିବାକୁ ମିଳିଥିଲା ତାଙ୍କ ପୁଅ ପାଖରେ । ପୁଅ ଦୌଡୁ ଥିଲେ ତା ସାଙ୍ଗରେ ଦୌଡୁଥିଲେ ବ୍ୟକ୍ତିଗତ ସୁରକ୍ଷା କର୍ମୀ ନାରାଣ ଦାସ । ଏ ବାବୁ ଜଣଙ୍କ କେବଳ ଏଇ କାମ କରନ୍ତି ନା ପରିବାରର ଆଉ କିଛି କାମ କରନ୍ତି ? ଯାହାକୁ ନେଇ ବିଜେପି ଦଳ ପକ୍ଷରୁ ସାମ୍ବାଦିକ ସମ୍ମିଳନୀ କରାଯାଇଥିଲା । ଏହି ସୁରକ୍ଷା କର୍ମୀଙ୍କ ବହିସ୍କାର ଦାବି କରିଛନ୍ତି ବିଜେପି ନେତା ଅଭୟ କୁମାର ବାରିକ ।

ଏଠି ମନ୍ତ୍ରୀ ନାହାନ୍ତି କିନ୍ତୁ ମନ୍ତ୍ରୀଙ୍କୁ ଅସୁରକ୍ଷିତ ଛାଡି ଦେଇ ପୁଅ ସେବାରେ ଲାଗିଛନ୍ତି ସୁରକ୍ଷା କର୍ମୀ । ଏହା ମଧ୍ୟରେ ଯଦି କିଛି ଘଟଣା ଅବା ଅଘଟଣ ଘଟେ ସେଥିପାଇଁ କିଏ ଦାୟୀ ରହିବ ? ସରକାରୀ ଚାକିରି ଅଧିନିୟମର ଖୋଲାଖୋଲି ଉଲଂଘନ କରୁଥିବା ଏହି କର୍ମଚାରୀଙ୍କ ପାଇଁ ସରକାର କି ପ୍ରକାରର ପଦକ୍ଷେପ ନେବେ । ପ୍ରତିକଥାରେ ୫ଟି କଥା କହୁଥିବା ରାଜ୍ୟ ସରକାର ଏଭଳି ଏକ ସମ୍ବେଦନଶୀଳ ଘଟଣା ଉପରେ, ଏହି କର୍ମଚାରୀଙ୍କ ଉପରେ କି ପ୍ରକାରର କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି ତା ଉପରେ ରହିବସମସ୍ତଙ୍କ ନଜର ।

ଓଡ଼ିଶା ଦେଖିଛି ଜଣେ ସଚିବଙ୍କ ଗସ୍ତ ସମୟରେ ତ୍ରିସ୍ତରୀୟ ସୁରକ୍ଷା ବ୍ୟବସ୍ଥାର ଚିତ୍ର । ତାପରେ ମଧ୍ୟ କାଳିମାଡ ଏବଂ ଅଣ୍ଡାମାଡ ନୂଆକଥା ହୋଇନାହିଁ । ସୁରକ୍ଷା ବଳୟକୁ ଭେଦି ମନ୍ତ୍ରୀଙ୍କୁ ହତ୍ୟା ହେଉ ବା ମୁଖ୍ୟମନ୍ତ୍ରୀଙ୍କୁ କଳାପତାକା ସବୁ ପରେ ମଧ୍ୟ ସୁରକ୍ଷାକୁ ଗୁରୁତ୍ୱ ଦେଉଥିବା ସରକାର ଆଠଗଡ଼ ଘଟଣାରେ କି ପ୍ରକାର ପଦକ୍ଷେପ ନେବେ ।