ଭୁବନେଶ୍ୱର:  ଦଶପଲ୍ଲାକୁ ଗଡ଼ିଲା ଟ୍ରେନ । ସମ୍ପ୍ରସାରଣର ଶୁଭାରମ୍ଭ କରିଛନ୍ତି ରେଳମନ୍ତ୍ରୀ ଅଶ୍ବିନୀ ବୈଷ୍ଣବ । ସବୁଜ ପତାକା ଦେଖାଇ ଟ୍ରେନ୍ ଚଳାଚଳର ଶୁଭାରମ୍ଭ କଲେ ରେଳମନ୍ତ୍ରୀ । ଭୁବନେଶ୍ବର-ନୟାଗଡ଼ ଟାଉନ ଏକ୍ସପ୍ରେସ୍, ଭୁବନେଶ୍ବର -ନୂଆଗାଁ ରୋଡ଼ ପାସେଞ୍ଜର ସ୍ପେଶାଲ, ପୁରୀ-ନୂଆଗାଁ ରୋଡ଼ ପାସେଞର ସ୍ପେଶାଲ, ଭଦ୍ରକ-ନୟାଗଡ଼ ଟାଉନ ମେମୁ ଟ୍ରେନ ଗୁଡ଼ିକର ସମ୍ପ୍ରସାରଣ କରାଯାଇଛି । ସେହିପରି ଦଶପଲ୍ଲା ରେଳ ଷ୍ଟେସନର  ଉଦ୍‌ଘାଟନ କରିଛନ୍ତି କେନ୍ଦ୍ର ରେଳମନ୍ତ୍ରୀ । ଏହି ଅବସରରେ ସେ କହିଛନ୍ତି, ମୋଦିଙ୍କ ଫୋକସରେ ରହିଛି ଓଡ଼ିଶା । ୨୦୧୪ ବେଳକୁ ଓଡ଼ିଶାକୁ ଆସୁଥିଲା ୮୦୦ କୋଟିର ଅନୁଦାନ । ୨୦୧୪ ପରେ ୧୦ ହଜାର କୋଟି ଅନୁଦାନ ଆସୁଛି ।  ୨୦୧୪ ପୁର୍ବରୁ ୫୦ କିମି ନୂଆ ରେଳପଥ ନିର୍ମାଣ ହେଉଥିଲା । କିନ୍ତୁ ଏବେ ବର୍ଷକୁ ୪୫୦ କିମି ରେଳପଥ ନିର୍ମାଣ ହେଉଛି । ଖୋର୍ଦ୍ଧା - ବଲାଙ୍ଗିର ରେଳ ଲାଇନ ଏକ ଐତିହାସିକ ପ୍ରକଳ୍ପ । ଦୀର୍ଘ ବର୍ଷ ଧରି କାମ ଶେଷ ହୋଇପାରିନଥିଲା । କିନ୍ତୁ ୨୦୧୪ରେ ମୋଦି ପ୍ରଧାନମନ୍ତ୍ରୀ ହେବା ପରେ ଯୁଦ୍ଧକାଳୀନ ଭିତ୍ତିରେ କାମ ଆଗେଇ ଚାଲିଛି । ଏହା ମୋଦିଙ୍କ ଗ୍ୟାରେଣ୍ଟି ବୋଲି କହିଛନ୍ତି ଅଶ୍ଵିନୀ । ଓଡ଼ିଶାକୁ ସମୃଦ୍ଧ ଏବଂ ବିକଶିତ ରାଜ୍ୟ କରିବା ମୋଦି ଗ୍ୟାରେଣ୍ଟିରେ ପ୍ରାଥମିକତା । 

ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସବକା ସାଥ, ସବକା ବିକାଶ, ସବକା ପ୍ରୟାସ ନୀତି ଯୋଗୁଁ ଆଜି ଏହା ସମ୍ଭବ ହୋଇପାରିଛି । କେନ୍ଦ୍ର ସରକାରଙ୍କ ସବୁ ଯୋଜନାରେ ଓଡ଼ିଶାକୁ ଏକ ନମ୍ବର କରିବାକୁ ପଡ଼ିବ । ଏଥିପାଇଁ ଦଳୀୟ ଭାବନା ଏବଂ ରାଜନୀତିରୁ ଉପରକୁ ଉଠି କାମ କରିବାକୁ ପଡ଼ିବ । ସେହିପରି ଦଶପଲ୍ଲା ଷ୍ଟେସନରେ ହେବ ଟିକେଟ ପଞ୍ଜୀକରଣ କାଉଣ୍ଟର । ଏହି କାର୍ଯ୍ୟକ୍ରମ ଅବସରରେ ଘୋଷଣା କରିଛନ୍ତି କେନ୍ଦ୍ର ରେଳମନ୍ତ୍ରୀ ଅଶ୍ବିନୀ ବୈଷ୍ଣବ । ଆଗାମୀ ରଥ ଯାତ୍ରା ବେଳକୁ ଟ୍ରେନରେ ବସି ପୁରୀ ଯିବେ ଦଶପଲ୍ଲା ସମେତ ନୟାଗଡ଼ ଜିଲ୍ଲାର ଅଧିବାସୀ । ଏଥିପାଇଁ ରଥଯାତ୍ରା ବେଳକୁ ସ୍ଵତନ୍ତ୍ର ଟ୍ରେନ ଚଳାଇବା ନେଇ ଘୋଷଣା କରିଛନ୍ତି କେନ୍ଦ୍ର ରେଳମନ୍ତ୍ରୀ । ଫୁଲବାଣୀକୁ ରେଳ ସଂଯୋଗ ପ୍ରସଙ୍ଗରେ ORIDL ଆଣିଥିବା ଡିପିଆର ଫେରାଇ ଦେଇଛନ୍ତି ରେଳ ମନ୍ତ୍ରୀ । ପୁଣି ଥରେ ଫୁଲବାଣୀକୁ ଯୋଡ଼ି ଡିପିଆର ପଠାଇବାକୁ ନିର୍ଦ୍ଦେଶ ଦେଇଛନ୍ତି ଅଶ୍ବିନୀ ବୈଷ୍ଣବ । ସବୁ ଜିଲ୍ଲାକୁ ରେଳ ସଂଯୋଗ ହେଉ ବୋଲି ଚାହୁଁଛନ୍ତି ମୋଦି । ଆମେରିକା, ଜାପାନ ଠାରୁ ମଧ୍ୟ ଉନ୍ନତ ଧରଣର ରେଳ ଷ୍ଟେସନ ଭୁବନେଶ୍ଵରରେ ତିଆରି ହେଉଛି ବୋଲି କହିଛନ୍ତି କେନ୍ଦ୍ର ରେଳମନ୍ତ୍ରୀ ଅଶ୍ବିନୀ ବୈଷ୍ଣବ।

ଅଧିକ ପଢନ୍ତୁ ଓଡ଼ିଶା ଖବର