କଟକ: ପରିକ୍ରମା ପ୍ରକଳ୍ପକୁ ଗୁରୁତ୍ବ ଦେଲେ ଅଥଚ ରତ୍ନଭଣ୍ଡାର ପ୍ରସଙ୍ଗରେ ସମୟ ମାଗିଲେ ରାଜ୍ୟ ସରକାର । ରତ୍ନ ଭଣ୍ଡାର ଚାବି ହଜିବା ପ୍ରସଙ୍ଗରେ ଜଷ୍ଟିସ ରଘୁବୀର ଦାସ ତଦନ୍ତ କମିଶନ ରିପୋର୍ଟକୁ ସାର୍ବଜନୀନ କରିବାକୁ ଆହୁରି ଦୁଇ ରୁ ତିନି ଦିନର ସମୟ ଲୋଡ଼ିଛନ୍ତି ରାଜ୍ୟ ସରକାର ।  ଏଥିପାଇଁ କୋର୍ଟ ମଧ୍ୟ ସରକାରଙ୍କୁ ମହଲତ ଦେଇଛନ୍ତି । ଆସନ୍ତା ଦୁଇ ସପ୍ତାହ ପରେ ଏହି ମାମଲାର ପରବର୍ତ୍ତୀ ଶୁଣାଣୀ ପାଇଁ କୋର୍ଟ ଦିନ ଧାର୍ଯ୍ୟ କରିଛନ୍ତି । 

ଆବେଦନକାରୀ ଦିଲ୍ଲୀପ ବରାଳଙ୍କ ପକ୍ଷରୁ ଦାଖଲ ଜନସ୍ବାର୍ଥ ମାମଲା ପରିଚାଳନା କରୁଥିବା ଆଇନଜୀବୀ ଅନୁପ ମହାପାତ୍ର ଏହି ସୂଚନା ଦେଇଛନ୍ତି । ତେବେ ପୂର୍ବରୁ ଜୁଲାଇ ୦୧, ୨୦୨୩ ରେ ଜଷ୍ଟିସ ରଘୁବୀର ଦାସ ତଦନ୍ତ କମିଶନ ରିପୋର୍ଟ ସ୍ଥିତି ସମ୍ପର୍କରେ ଜଣେଇବା ପାଇଁ କୋର୍ଟ ନିର୍ଦ୍ଦେଶ ଦେଇଥିଲେ । ହେଲେ ସେତେବେଳେ ରାଜ୍ୟ ସରକାର ଅଧିକ ସମୟ ନେଇଥିଲେ । 

ଏହା ପରେ ହୋଇଥିବା ପ୍ରତ୍ୟେକ ଶୁଣାଣୀ ସମୟରେ ରାଜ୍ୟ ସରକାର ସମୟ ଲୋଡ଼ି ଚାଲିଥିଲେ । ପୁରୀରେ ପରିକ୍ରମା ପ୍ରକଳ୍ପର ଲୋକାର୍ପଣ ପାଇଁ ତତ୍ପରତା ଦେଖାଇଥିବା ସରକାର କାହିଁକି ରତ୍ନଭଣ୍ଡାର ପ୍ରସଙ୍ଗରେ ସମୟ ଗଡ଼ାଉଛନ୍ତି ତାକୁ ନେଇ ନାନା ପ୍ରଶ୍ନ ସୃଷ୍ଟି ହୋଇଛି ।

ଆହୁରି ପଢନ୍ତୁ ଓଡିଶା ଖବର...