ମା'କୁ ବିଦ୍ୟୁତ୍ ଖୁଣ୍ଟରେ ବାନ୍ଧି ମାଡ଼ ମାରିବା ଘଟଣା, ପୁଅ ଗିରଫ

କେନ୍ଦୁଝର: ସାମାନ୍ୟ ଗୋଟିଏ କୋବି ପାଇଁ ଚମ୍ପୁଆ ଥାନା ସରାଶପଶିରେ ଜନ୍ମ କଲା ମା'କୁ ବିଦ୍ୟୁତ୍ ଖୁଣ୍ଟରେ ବାନ୍ଧି ମାଡ଼ ମାରିବା ଘଟଣାକୁ ନେଇ ଖବର ପ୍ରସାରଣ ହେବା ପରେ ଆଜି ଚମ୍ପୁଆ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଏନେଇ କେସ ନଂ ୨୨୬/୨୩ ରେ ଏକ ମାମଲା  ରୁଜ୍ଜୁ କରିବା ସହ ଦଫା ୩୪୧,୩୪୨ ଓ ୨୯୪ ଆଇ ପି ସି ରେ ଅଭିଯୁକ୍ତ ପୁଅ ଶତୃଘ୍ନ ମହାନ୍ତକୁ ଗିରଫ କରି କୋର୍ଟ ଚାଲାଣ କରାଯାଥିବା ଚମ୍ପୁଆ ପୋଲିସ୍ ସୂଚନା ଦେଇଛି । 

ତେବେ ପୀଡ଼ିତା ବୃଦ୍ଧାଙ୍କୁ ମେଡ଼ିକାଲରେ ନର୍ସ ଓ କର୍ମଚାରୀଙ୍କ ଉପସ୍ଥିତିରେ ତାଙ୍କ ବୋହୂ ମାଡ଼ ମାରିଥିବା ନେଇ ଅଭିଯୋଗ ହୋଇଥିଲେ ହେଁ ଏନେଇ ପୋଲିସ୍ ବୋହୂଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ନେଇ ନାହିଁ । 

ଗତ ବୁଧବାର, ଶତ୍ରୁଘ୍ନଙ୍କ ବାଡିରୁ କେହି ଗୋଟିଏ କୋବି କାଟି ନେଇଯାଇଥିବା ବେଳେ, ମା' ସୁଭଦ୍ରାଙ୍କ ଉପରେ ସନ୍ଦେହ କରି ପାଟିତୁଣ୍ଡ କରିବା ପରେ ବୁଧବାର ଏବଂ ଗୁରୁବାର ୨ ଦିନ ଧରି ମାର ଧର କରିଥିଲେ ।  ଶୁକ୍ରବାର ପୁଣି ପାଟି ତୁଣ୍ଡ କରି ମା' ଙ୍କୁ ଘରୁ ଘୋଷାଡି ଆଣି ତାଙ୍କ ହାତ ଗୋଡ ବାନ୍ଧି ବାହାରେ ଥିବା ଏକ ଇଲେକ୍ଟ୍ରି ଖୁଣ୍ଟରେ ବାନ୍ଧି ପକାଇଥିଲେ ନିଷ୍ଠୁର ପୁଅ ଶତୃଘ୍ନ ।  
ଏହି ଅମାନବୀୟ ଦୃଶ୍ୟ ଦେଖି ସ୍ଥାନୀୟ ଲୋକେ ଏହାର ପ୍ରତିବାଦ କରିବା ସହ ସୁଭଦ୍ରାଙ୍କୁ ମୁକୁଳାଇବା ସହିତ ପୋଲିସକୁ ଖବର ଦେଇଥିଲେ । ପରେ ପୁଲିସ ସ୍ଥାନୀୟ ଲୋକଙ୍କ ସହାୟତାରେ ବୃଦ୍ଧାଙ୍କୁ ଉଦ୍ଧାର କରି ନିକଟସ୍ଥ ବାସୁଦେବପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ ।  ତେବେ ଡାକ୍ତରଖାନାରେ ଶାଶୁଙ୍କୁ ଆକ୍ରମଣ କରିବାକୁ ପଛାଇ ନଥିଲେ ଉଦ୍ଧତ ବୋହୂ । ଏହା ଦେଖି ଡାକ୍ତରଖାନାର ନର୍ସ ଏବଂ କର୍ମଚାରୀ ପ୍ରତିବାଦ କରିବା ସହ ପୋଲିସକୁ ଜଣାଇଥିଲେ ।

ଆହୁରି ପଢନ୍ତୁ ଓଡିଶା ଖବର...