ଅର୍ଗସ ବ୍ୟୁରୋ : ଶ୍ରୀମନ୍ଦିର ଭିତର ରତ୍ନଭଣ୍ଡାର ପ୍ରସଙ୍ଗରେ ଏବେ ହରଡଘଣାରେ ରାଜ୍ୟ ସରକାର । ଭିତର ରତ୍ନ ଭଣ୍ଡାର ଛାବି ହଜିବା ଘଟଣାର ତଦନ୍ତ କରିଥିବା ଜଷ୍ଟିସ ରଘୁବର ଦାସ କମିସନଙ୍କ ରିପୋର୍ଟ ସାର୍ବଜନୀନ କରିବାକୁ ହାଇକୋର୍ଟଙ୍କ ନିର୍ଦ୍ଦେଶ । ଏବେ ରାଜ୍ୟ ସରକାରଙ୍କ ଆଗରେ କର ବା ମର ସ୍ଥିତି । ୮ ମାସ ହେବ କୋର୍ଟଙ୍କୁ ଭଣ୍ଡାଇ ଚାଲିଥିଲେ ରାଜ୍ୟ ସରକାର । ଏବେ ହାଇକୋର୍ଟ ଦେଇଛନ୍ତି ଶେଷ ସୁଯୋଗ । ଆବେଦନକାରୀ ଦିଲ୍ଲୀପ ବରାଳଙ୍କ ପକ୍ଷରୁ ଦାୟର ଆବେଦନ ଉପରେ ଶୁଣାଣି କରି ଏହି ନିର୍ଦ୍ଦେଶ ଦେଇଛନ୍ତି ଉଚ୍ଚ ଅଦାଲତ ।

ଏ ପ୍ରସଙ୍ଗରେ ହାଇକୋର୍ଟଙ୍କ ପୂର୍ବ ନିର୍ଦ୍ଦେଶ ପରେ ୮ ମାସ ସମୟ ନେଇସାରିଲେଣି ରାଜ୍ୟ ସରକାର । ଏହା ମଧ୍ୟରେ ୬ ଟି ତାରିଖ ମଧ୍ୟ ଗଲାଣି । ହେଲେ ବିଭିନ୍ନ ବାହାନା ଦେଖାଇ କୋର୍ଟଙ୍କୁ ଭୁଆଁ ବୁଲାଇ ଚାଲିଛନ୍ତି  ବିଜେଡି ସରକାର । ଏବେ ପ୍ରଶ୍ନ ଉଠୁଛି କାହଁକି ରିପୋର୍ଟ ସାର୍ବଜନୀନ କରିବାକୁ ରାଜ୍ୟ ସରକାର ଏତେ ଡରୁଛନ୍ତି । ରିପୋର୍ଟ ପଦାକୁ ଆସିଲେ  ରତ୍ନଚୋରୀର ପୋଲ୍ ଖୋଲିଯିବ ବୋଲି କହିଛନ୍ତି ଜଗନ୍ନାଥ ସେନା ଆବାହକ । ସେପଟେ ଏଭଳି ସମ୍ବେଦନଶୀଳ ପ୍ରସଙ୍ଗରେ ଅତି  ଦାୟିତ୍ବହୀନ ମନ୍ତବ୍ୟ ଦେଇଛନ୍ତି ଶ୍ରୀମନ୍ଦିର ପରିଚାଳନା କମିଟିର ସଦସ୍ୟ ମାଧବ ମହାପାତ୍ର । 

ଅଧିକ ପଢନ୍ତୁ ଓଡ଼ିଶା ଖବର

୨୦୧୮ ଏପ୍ରିଲ୍ ୪ ତାରିଖରେ ଭିତର ରତ୍ନଭଣ୍ଡାର ଚାବି ହଜିବା କଥା ଜଣାପଡିବା ପରେ ରାଜ୍ୟବ୍ୟାପୀ ଜୋରଦାର ଆନ୍ଦୋଳନ ହୋଇଥିଲା । ତେଣୁ ୨୦୧୮ ଜୁନ୍ ୬ ତାରିଖରେ ରାଜ୍ୟ ସରକାର ଜଷ୍ଟିସ ରଘୁବୀର ଦାସ ତଦନ୍ତ କମିଶନ ଗଠନ କରିଥିଲେ । ୨୦୧୮ ନଭେମ୍ବର ୨୯ ତାରିଖରେ ରାଜ୍ୟ ସରକାରଙ୍କୁ ୩୨୪ ପୃଷ୍ଠାର ଏକ ରିପୋର୍ଟ ଜଷ୍ଟିସ ରଘୁବୀର ଦାସ ପ୍ରଦାନ କରିଥିଲେ । କମିଶନ ପାଇଁ ଖର୍ଚ୍ଚ ହୋଇଥିଲା ପ୍ରାୟ ୨୨ଲକ୍ଷ ଟଙ୍କା । ତେବେ ରାଜ୍ୟ ସରକାର ରିପୋର୍ଟକୁ ସାର୍ବଜନୀନ ନକରି ୫ ବର୍ଷ ହେଲା ଚାପି ରଖିଛନ୍ତି । ରିପୋର୍ଟ ସାର୍ବଜନୀନ ହେଲେ ରତ୍ନଭଣ୍ଡାର ଲୁଟ୍ ଘଟଣାରେ ଅନେକ ଅଧିକାରୀଙ୍କ ପୋଲ୍ ଖୋଲିଯିବ ବୋଲି ଚୁପ ରହିଛନ୍ତି ରାଜ୍ୟ ସରକାର ।

ରତ୍ନଭଣ୍ଡାର ଚାବି କେମିତି ହଜିଲା, ନା ଚାବି ହଜିବା କେବଳ ଏକ ନାଟକ ଥିଲା । ତାହା କେବଳ ଜଷ୍ଟିସ ରଘୁବୀର ଦାସ୍ ତଦନ୍ତ କମିଶନଙ୍କ ରିପୋର୍ଟ ଖୁଲାସା କରିପାରିବ। ଆସନ୍ତା ଜାନୁଆରୀ ପ୍ରଥମ ସପ୍ତାହରେ ମାମଲାର ପରବର୍ତ୍ତୀ ଶୁଣାଣି ହେବ । ତେଣୁ ରାଜ୍ୟ ସରକାର ରିପୋର୍ଟକୁ ସାମ୍ନାକୁ ଆଣିବେ ନା ଏହାକୁ ଟାଳିବା ପାଇଁ ଆଉ କିଛି ନୂଆ ଉପାୟ ଖୋଜିବେ ଏହା ଉପରେ ସମସ୍ତଙ୍କ ନଜର ।