ଅର୍ଗସ ବ୍ୟୁରୋ : ଚାଲିଛି ମାର୍ଗଶୀର ମାସ । ଏହି ମାସରେ ଘରେ ଘରେ ପୂଜା ପାଆନ୍ତି ମା' ଲକ୍ଷ୍ମୀ ଠାକୁରାଣୀ । ସେଥି ପାଇଁ ଚଳଞ୍ଚଳ ଓଡ଼ିଆଙ୍କ ଘରଦ୍ବାର । ସେଥି ପାଇଁ ତ ଓଡ଼ିଆ ଘର ବୋହୂ ସକାଳି ଉଠି ଘର ହୁଆର ମୁହଁରୁ ଆରମ୍ଭ କରି ଗାଁ ଦାଣ୍ଡରେ ପକାନ୍ତି ଝୋଟି ଚିତା । ସେହି ଭଳି ଏକ ଐତିହ୍ୟ ଗ୍ରାମ ହେଉଛି ରଘୁରାଜପୁର । ଝୋଟି ଚିତାରେ ଚମକିଲା ଏହି ଗ୍ରାମ । ଦେଖୁନାହାନ୍ତି କେମିତି ଗ୍ରାମର ସବୁ ଦୁଆର ମୁହଁରେ ଲିପା ହୋଇଛି ଗୋବର । ଗୋବରର ଆସ୍ତରଣ ଉପରେ ଅଙ୍କା ହୋଇଛି ଆଖି ଝଲସିଲା ଭଳି ଝୋଟି ଚିତା ।

ଯଦିଓ ମାଣବସା ଗୁରୁବାରରେ ଓଡ଼ିଆ ଘରର ସମସ୍ତ ପରିବାରର ମହିଳା ଏହି ଝୋଟି ଚିତା ଆଙ୍କିଥାନ୍ତି, କିନ୍ତୁ ଏଥର ପ୍ରତିଯୋଗିତା ମୂଳକ ଭାବରେ ରଘୁରାଜପୁର ଗାଁରେ ମହିଳା ମାନେ ଏହି ଝୋଟି ଚିତା ଆଙ୍କି ଦେଇଛନ୍ତି । ପ୍ରତ୍ୟେକ ଝୋଟି ଚିତ୍ରରେ ରହିଛି ଓଡ଼ିଆତ୍ଵ । ଆଉ ପାରମ୍ପରିକ ପୀଠଉରେ ଗାଁର ମହିଳା ମାନଙ୍କ ହାତର ସ୍ପର୍ଶରେ ଫୁଟି ଉଠିଛି ସୁନ୍ଦର ସୁନ୍ଦର ଚିତ୍ରକଳା । ଓଡ଼ିଆ କଳାର ରହିଛି ସ୍ୱତନ୍ତ୍ର ପରିଚୟ । ଆଉ ଏହି ଉତ୍କର୍ଷତା ମଧ୍ୟରେ ରହିଛି ଓଡ଼ିଆ ଘରର ଝୋଟି ଚିତ୍ର । ଯାହା ପବିତ୍ର ମାଣବସା ଗୁରୁବାରରେ ପ୍ରତ୍ୟେକ ଓଡ଼ିଆ ଘରେ ଓ ଦାଣ୍ଡ ଦୁଆରେ ଅଙ୍କା ଯାଇଥାଏ । ହେଲେ ଏବେ ବଜାରରେ ଏହାର ବିକଳ୍ପ ମିଳିବା ଦ୍ଵାରା ବିଭିନ୍ନ ଷ୍ଟିକର ଠାରୁ ଆରମ୍ଭ କରି ଡାଇସ ମାଧ୍ୟମରେ ଚିତ୍ର ଆଙ୍କିବାକୁ ମନ ବଳାଉଛନ୍ତି ।

ହେଲେ ପାରମ୍ପରିକ ଚିତାର ଯେଉଁ ଉତ୍କର୍ଷତା ରହିଛି ତାହା ମୋଉଳିବାକୁ ବସିଲାଣି । କିନ୍ତୁ ସେମାନଙ୍କୁ ଏନକରେଜ୍ କରିବା ପାଇଁ ଓଡ଼ିଆ ଲଳିତ କଳା ଏକାଡେମୀ ତରଫରୁ ଏଭଳି ପ୍ରତିଯୋଗିତା ମୂଳକ ପଦକ୍ଷେପ ଗ୍ରହଣ କରାଯାଇଛି । ଯାହାଦ୍ଵାରା ପାରମ୍ପରିକ ଝୋଟି ଚିତାର ପ୍ରଚାର ପ୍ରସାର ହେବା ସହ ପ୍ରତ୍ୟେକ ଓଡ଼ିଆ ନାରୀ ଭିତରେ ଏହି ପରମ୍ପରାକୁ ଜାବୁଡ଼ି ରଖିବା ପାଇଁ ଆଗ୍ରହ ଜାତ ହେବ । ମାଣବସାର ପରମ୍ପରା ପ୍ରତ୍ୟକ ଓଡ଼ିଆ ପାଇଁ ଗର୍ବ ଓ ଗୌରବର ବିଷୟ । ଯାହାର କାହାଣୀ ଲକ୍ଷ୍ମୀ ପୁରାଣର ଉପାଦେୟତା ହେତୁ ଏହାର ବ୍ୟାପକ ପ୍ରଚାର ଓ ପ୍ରସାର ଜାରି ରହିଛି । ଠିକ୍ ସେଇଭଳି ଏଇ ଉତ୍କର୍ଷ ସମ୍ପନ୍ନ ପାରମ୍ପରିକ ଝୋଟି ଚିତାର ମଧ୍ୟ ପ୍ରଚାର ଓ ପ୍ରସାରର ଆବଶ୍ୟକତା ରହିଛି ।

Argus English | argus english | Odisha Latest News, Breaking News, Trending News, Live TV