କଟକ:  ନେତାଜୀଙ୍କ ଜୟନ୍ତୀ ପାଇଁ ଚଳଚଞ୍ଚଳ ଜନ୍ମସ୍ଥାନ କଟକ । ଜାନୁଆରୀ ୨୩ରେ ନେତାଜୀଙ୍କ ୧୨୭ତମ ଜନ୍ମ ଜୟନ୍ତୀ । ଏଥିପାଇଁ ସଜେଇ ହେଲାଣି ନେତାଜୀ ଜନ୍ମସ୍ଥାନ ସଂଗ୍ରହାଳୟ । ବିଭିନ୍ନ ଗ୍ୟାଲେରୀ ସହ ସଂଗ୍ରହାଳୟ ପରିସରକୁ ଦିଆଯାଉଛି ନୂଆ ରୁପ । ସଂସ୍କୃତି ବିଭାଗ ପକ୍ଷରୁ ସଂଗ୍ରହାଳୟ କୋଠାକୁ ଆର୍କିଟେକ୍ଚରାଲ ଇଲୁମିନେସନ ବା ସ୍ଥାପତ୍ୟ ଆଲୋକିକରଣରେ ସଜା ଯାଉଛି । ଏଥିପାଇଁ ଖର୍ଚ୍ଚ ହେଉଛି ୧ କୋଟି ୧୮ ଲକ୍ଷ ଟଙ୍କା । 

ପ୍ରଥମ ପର୍ଯ୍ୟାୟରେ ୬୪ ଲକ୍ଷ ଏବଂ ଦ୍ବିତୀୟ ପର୍ଯ୍ୟାୟରେ ୫୪ ଲକ୍ଷ ଟଙ୍କା ଖର୍ଚ୍ଚ କରାଯାଉଛି । ଯାହା ସଂଗ୍ରହାଳୟ କୋଠାକୁ ଅଧିକ ଜୀବନ୍ତ କରିବା ସହ ବହୁ ପର୍ଯ୍ୟଟକଙ୍କୁ ଆକର୍ଷିତ କରିବ । ଏଥର ନୂଆକରି ସଂଗ୍ରହାଳୟରେ ନେତାଜୀ ବାଲ୍ୟ ଜୀବନୀ ଗ୍ୟାଲେରୀରେ ସ୍ଥାନ ପାଇବାକୁ ଯାଉଛି ଷ୍ଟୁଆର୍ଟ ସ୍କୁଲର ଆଡ଼ମିସନ ରେଜିଷ୍ଟ୍ରର । ୧୯୦୨ ମସିହାରୁ ୧୯୦୮ ମସିହା ଯାଏ ନେତାଜୀ ପାଠ ପଢୁଥିବା ସମୟର ଏହି ରେଜିଷ୍ଟ୍ରରକୁ ନେତାଜୀ ସଂଗ୍ରହାଳୟକୁ ପ୍ରଦାନ କରିଛନ୍ତି ସ୍କୁଲ କର୍ତ୍ତୃପକ୍ଷ । ଏହା ବ୍ୟତୀତ ନେତାଜୀ ଜୟନ୍ତୀ ଅବସରରେ ଓଡ଼ିଶା ଲଳିତକଳା ଏକାଡେମୀ ଦ୍ବାରା ନେତାଜୀଙ୍କ ଉପରେ ଆଧାରିତ ଏକ ଚିତ୍ର ଓ ଭାସ୍କର୍ଯ୍ୟ କଳା ଶିବିର ଆୟୋଜନ ହେବାର କାର୍ଯ୍ୟକ୍ରମ ରହିଛି ।

ନେତାଜୀଙ୍କ ଜୟନ୍ତୀ ପାଳନ ପାଇଁ କଟକ ଓଡ଼ିଆ ବଜାରସ୍ଥିତ ନେତାଜୀ ଜନ୍ମସ୍ଥାନ ସଂଗ୍ରହାଳୟରେ ଚାଲିଛି ପ୍ରସ୍ତୁତି । ବିଭିନ୍ନ କାର୍ଯ୍ୟକ୍ରମ ହେବାକୁ ଥିବା ବେଳେ ବହୁ ବିଶିଷ୍ଟ ବ୍ୟକ୍ତି ଓ ସ୍ବାଧୀନତା ସଂଗ୍ରାମୀ ଏଥିରେ ଯୋଗଦେବେ । ଅନ୍ୟପଟେ ଖୁବଶୀଘ୍ର  ନେତାଜୀ ବ୍ୟାଖ୍ୟାନ କେନ୍ଦ୍ର ସହ ଗଙ୍ଗା ମନ୍ଦିର ପୁଷ୍କରିଣୀରେ ଉଜ୍ଜ୍ୱଳ ଅଲୋକୀକରଣର ବ୍ୟବସ୍ଥା କରିବାକୁ ଯାଉଛି କଟକ ମହାନଗର ନିଗମ । ଲେଜର ସୋ ପାଇଁ ୫୦ କୋଟିର ବଜେଟ ଥିବା କହିଛନ୍ତି ମେୟର ସୁବାଷ ସିଂ ।

ନେତାଜୀ ଜୟନ୍ତୀ ପୂର୍ବରୁ ଯୁଦ୍ଧକାଳୀନ ଭିତ୍ତିରେ ଚାଲିଛି ସଂଗ୍ରହାଳୟ କାମ । ଏବେ ଅପେକ୍ଷା ଜାନୁଆରୀ ୨୩କୁ ।

ଆହୁରି ପଢନ୍ତୁ ଓଡିଶା ଖବର...