Argus News - 'ମାସ ଶେଷକୁ ବର୍ଷ ଶେଷ, ପକେଟ୍ ରେ ଥାଉ ନଥାଉ ଆମେ ଖାଇବୁ'

ଭୁବନେଶ୍ୱର:  ରାଜଧାନୀରେ ଅଦିନିଆ ଛାଡଖାଇ ।  ବର୍ଷ ଶେଷରେ ଆମିଷ ବଜାରରେ ନାହିଁ ନଥିବା ଭିଡ ଦେଖିବାକୁ ମିଳିଛି । ଆଜି ବର୍ଷ ଶେଷକୁ ରବିବାର । ଆମିଷ ପ୍ରେମୀଙ୍କ ପାଇଁ ଖୁସି ଦ୍ୱିଗୁଣିତ ହୋଇଯାଇଛି । ଘରେ ଘରେ ଆମିଷର ବିଭିନ୍ନ ପ୍ରକାରର ବ୍ୟଞ୍ଜନ ବନାଇ ଖାଇବାକୁ ପ୍ରସ୍ତୁତି ଚାଲିଛି । ସେପଟେ 4 ନମ୍ବର ମାଛ ମାର୍କେଟରେ ନାହିଁ ନଥିବା ଭିଡ଼ ଜମିଛି । 

କଙ୍କଡା, ଚିଙ୍ଗୁଡି, ଭଳିକି ଭଳି ଦେଶୀ ମାଛ, ଇଲିସି, ପାମ୍ପରେଟ୍,ଜଳଙ୍ଗ, ମହୁରାଳି ଭଳି ବିଭିନ୍ନ ଭେରାଇଟି ମିଳୁଛି । ନୂଆବର୍ଷ ସୋମବାର ପଡ଼ୁଥିବାରୁ ଆଜି ଆମିଷ ମାର୍କେଟରେ ଭିଡ଼ ଜମିଥିବା ଦେଖିବାକୁ ମିଳିଛି । ମାସ ଶେଷକୁ ବର୍ଷ ଶେଷ । ପାଖରେ ଟଙ୍କା ଥାଉ ନଥାଉ ଭଲ ଖାଇବାକୁ କିଏ ବି ପଛ ଘୁଞ୍ଜା ଦେଉନାହାନ୍ତି ।  ଯେତେ ରେଟ୍ ହେଲେ ବି କିଲୋ ଦୁଇ କିଲୋ କିଣି ନେଉଛନ୍ତି । ଅବଶ୍ୟ ଦର ସେମିତି କିଛି ବଢିନି । କିନ୍ତୁ ଆସନ୍ତାକାଲି ସୋମବାର ଥିବାରୁ ଆଜି ହିଁ ଲୋକେ ଆମିଷ ଖାଇ ନୂଆବର୍ଷ ପାଳନ କରୁଛନ୍ତି । 

ସେପଟେ 4 ନଂ ମାଛ ମାର୍କେଟରେ ରୋହି ଦର 160, ଭାକୁର-180, ଚିଙ୍ଗୁଡି-450/500 ରହିଛି । ସେହିପରି ମାଛ ସହ ଆଜି ମଟନ ଦୋକାନ ମାନଙ୍କରେ ମଧ୍ୟ ଭିଡ ଜମିଛି । ବର୍ଷ ଶେଷକୁ ଛୁଟିବାର ପଡୁଥିବାରୁ ଘରେ ଘରେ ସେଲିବ୍ରେସନ, ଭୋଜି । 

ଦେଖୁ ଦେଖୁ 2023 ସରିଗଲା ।  ଏଇ ବର୍ଷ ଅନେକଙ୍କୁ ଅନେକ କିଛି ଶିଖାଇବା ସହ ଅନେକଙ୍କ ଜୀବନରେ ବହୁତ କିଛି ଘଟିଯାଇଛି । କିଏ ବହୁତ କିଛି ପାଇଛି ତ କିଏ ବହୁତ କିଛି ହରାଇଛି । ସେ ଯାହା ବି ହେଉ ଏହି ବର୍ଷକୁ ବିଦାୟ ଦେବା ସହ ଆସନ୍ତା ବର୍ଷ ଯେମିତି ସମସ୍ତଙ୍କର ଭଲରେ ଭଲରେ କଟୁ ସେଥିପାଇଁ ଖୁସି ମନରେ ସମସ୍ତେ ଉତ୍ସବ ମନାଉଛନ୍ତି । କିଏ ବୁଲିବାକୁ ଯାଉଛି ତ କିଏ ଘରେ ରହି ବିଭିନ୍ନ ପ୍ରକାରର ବ୍ୟଞ୍ଜନ ମନାଇ ସେଲିବ୍ରେଟ୍ କରୁଛି । ଗରିବଠୁ ଧନୀ ସମସ୍ତେ ନୂଆବର୍ଷକୁ ସ୍ୱାଗତ କରିବାକୁ ଯିଏ ଯେତିକି ପାରୁଛି କରୁଛି । ଇଂରାଜୀ ନବବର୍ଷକୁ ସ୍ୱାଗତ କରିବାକୁ ସବୁଠି ଚାଲିଛି ସେଲିବ୍ରେସନ ।

ଆହୁରି ପଢନ୍ତୁ ଓଡିଶା ଖବର...