ଅର୍ଗସ ବ୍ୟୁରୋ: କାମିୟା ଜାନିଙ୍କୁ ନେଇ ଘନେଇବାରେ ଲାଗିଛି ବିବାଦ । ସମୟ ଯେତିକି ଗଡୁଛି, ବିବାଦ ସେତିକି ବଢୁଛି । ଘଟଣା ହିନ୍ଦୁଙ୍କ ଭାବାବେଗ ସହ ଜଡିତ ଥିବାରୁ ଗୁରୁତ୍ଵ ବି ରହିଛି । ବିରୋଧୀଙ୍କ ଆଟାକ, ଓଡ଼ିଆଙ୍କ ପ୍ରଶ୍ନ ବାଣରେ ବିଜେଡିର ନିଦ ହଜିବା ପରେ ସଫେଇ ଦେଇଥିଲା ଶ୍ରୀମନ୍ଦିର ପ୍ରଶାସନ । ଟ୍ଵିଟ କରି କହିଥିଲା, ମନ୍ଦିର ଭିତରକୁ କ୍ୟାମେରା ଯାଇନାହିଁ । ଆଉ ଏହାକୁ ନେଇ ପୁଣି ପ୍ରଶ୍ନ କରିଥିଲେ ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାର । କହିଥିଲେ, ଭୋର ୪ଟାରେ ମନ୍ଦିର ଭିତରେ କି କାରସାଦି ହୋଇଥିଲା ? ବିବାଦ ବଢିବା ପରେ ବିଜେଡି ସାଂସଦ ମାନସ ମଙ୍ଗରାଜ ନିଜ ଏକ୍ସ ପେଜ୍‌ରେ ଲେଖିଛନ୍ତି ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ବିରୋଧୀ ସହିପାରୁନାହାନ୍ତି ତେଣୁ ଏମିତି କହୁଛନ୍ତି । ଆଉ ମାନସଙ୍କୁ କଡା ଜବାବ ଦେଇଛନ୍ତି ବିଜେପି ବିଧାୟକ ଲଳିତେନ୍ଦୁ ବିଦ୍ୟାଧର । କହିଛନ୍ତି, ଦୋଷ ଲୁଚାଇବାକୁ ଯେତେ ଅଧିକ ଚେଷ୍ଟା କରିବେ ସେତେ ଅଧିକ ମୁଖା ଖୋଲିବ ? 

ହିନ୍ଦୀ ବ୍ଲଗର ଗୋମାଂସ ଖିଆ କାମିୟା ଜାନି ଗତ କିଛିଦିନ ତଳେ ପୁରୀ ମନ୍ଦିର ଆସିଥିଲେ । ଆଉ ଏହି ସମୟରେ ଫାଇଭ-ଟି ସଚିବ ପାଣ୍ଡିଆନ ବି ତାଙ୍କ ସହ ଥିଲେ । ଏମିତିକି ମନ୍ଦିର ଭିତରକୁ ତାଙ୍କୁ ପାଣ୍ଡିଆନ ଡାକି ନେଉଥିବାର ଅଡିଓ କ୍ଲିପ୍‌ ବିଜେପି ପ୍ରେସମିଟ୍‌ରେ ଜାରି କରିଥିବା ବେଳେ ଲେଖାଶ୍ରୀ ଉଭୟଙ୍କ ମନ୍ଦିରରୁ ବାହାରୁଥିବାର ଭିଡିଓ ଟ୍ଵିଟ କଲେ । ଆଉ ଏତେ ସବୁ ପ୍ରମାଣ ପାଇବା ପରେ ବିଜେଡି ମୁହଁ ଚୁପ । କେବଳ ପାଣ୍ଡିଆନଙ୍କୁ ଘଉଡାଇବାକୁ ଚେଷ୍ଟା କରୁଛି ଦଳ ସତ ହେଲେ ବିରୋଧୀଙ୍କୁ ଚୁପ୍‌ କରିବାକୁ କିଛି ପ୍ରମାଣ ନାହିଁ । 

ଗୋମାଂସ ଭକ୍ଷଣକୁ ପ୍ରୋତ୍ସାହିତ କରୁଥିବା ଜଣେ ବ୍ଲଗର ମହାପ୍ରସାଦର ପ୍ରଚାର କରିବାକୁ ବିଜେଡି କେମିତି ଠିକ୍ ବୋଲି ଦର୍ଶାଇବାକୁ ଚେଷ୍ଟା କରୁଛି ? ଶ୍ରୀଜଗନ୍ନାଥଙ୍କ ମହାପ୍ରସାଦ ପବିତ୍ର, ଏହା କୌଣସି ରେସ୍ତୋରାଁର ଖାଦ୍ୟ ନୁହେଁ । ମହାପ୍ରସାଦ କୋଟି କୋଟି ହିନ୍ଦୁ ଓ ଜଗନ୍ନାଥ ପ୍ରେମୀଙ୍କ ଆସ୍ଥା ଓ ବିଶ୍ବାସର ପ୍ରତୀକ । ଏହାକୁ କେହି ପ୍ରଚାର କରିବା ଆବଶ୍ୟକତା ହିଁ ନାହିଁ । ତେବେ ଲଳିତେନ୍ଦୁ କହିଛନ୍ତି, କୌଣସି ବ୍ୟକ୍ତି ବା ଦଳ ଜଗନ୍ନାଥ ସଂସ୍କୃତିଠାରୁ ଉର୍ଦ୍ଧ୍ବରେ ନୁହନ୍ତି । କାମିଆ ଗୋମାଂସର ପ୍ରଚାର କରିଛନ୍ତି ନା ନାହିଁ ତାହା ସବୁଠାରୁ ବଡ଼ ପ୍ରଶ୍ନ ? ଏକଥା ଜାଣି ମଧ୍ୟ କେମିତି ଓ କାହିଁକି କାମିଆଙ୍କୁ ପାଣ୍ଡିଆନ ନିମନ୍ତ୍ରଣ କଲେ ? ସେପଟେ ଏହି ପ୍ରସଙ୍ଗରେ ପୁରୀ ବିଧାୟକ ଜୟନ୍ତ ଷଡ଼ଙ୍ଗୀ ଲେଖିଛନ୍ତି କାମିଆ ଜାନିଙ୍କ ଶ୍ରୀମନ୍ଦିର ପ୍ରବେଶ ଓ ମହାପ୍ରସାଦ ସେବନ କୋଟି ଜଗନ୍ନାଥ ପ୍ରେମୀଙ୍କ ହୃଦୟକୁ କଷ୍ଟ ଦେଇଛି । ଘଟଣାରେ ସମ୍ପୃକ୍ତ ସମସ୍ତଙ୍କୁ ଜଗନ୍ନାଥ ଠିକ ଦଣ୍ଡ ବିଧାନ କରିବେ । କେବଳ ଏତିକି ନୁହେଁ ବରଂ ଜାତୀୟ ସ୍ତରରେ ବି ଏହି ମାମଲା ଘନେଇବାରେ ଲାଗିଛି । ଏବେ ସମୟ କହିବ ବିଜେଡି କେମିତି ପାଣ୍ଡିଆନଙ୍କୁ ସୁରକ୍ଷା ଦେଉଛି ?