ଅର୍ଗସ ବ୍ୟୁରୋ : ସଂସଦ ଆକ୍ରମଣ ବାର୍ଷିକୀରେ ଧୂଆଁମୟ ସଂସଦ । କିଛି ସମୟ ପାଇଁ ସାଂସଦଙ୍କ ମଧ୍ୟରେ ଖେଳିଯାଇଥିଲା ଭୟର ବାତାବରଣ । ୨୨ ବର୍ଷ ପୂର୍ବର ଭୟଙ୍କର ସ୍ମୃତି ମନରୁ ଲିଭି ନଥିବାବେଳେ ନୂଆ ସଂସଦ ଭବନରେ ଆଜିର ଦିନରେ ଏମିତି ଘଟଣା ଘଟିବ କେହି ଭାବି ନଥିଲେ । ସବୁ ସାଂସଦ ଚମକି ପଡ଼ିଥିଲେ । ଦେଖିବାକୁ ମିଳିଥିଲା ଜଣେ ଯୁବକ ଗୋଟିଏ ବେଞ୍ଚରୁ ଆଉ ଗୋଟିଏ ବେଞ୍ଚକୁ ଡେଇଁ ଡେଇଁ ଚାଲିଛି । ଲୋକସଭାରେ ଗୃହକାର୍ଯ୍ୟ ଜାରି ରହିଥିବା ବେଳେ ଲୋକସଭା ଦର୍ଶକ ଗ୍ୟାଲେରୀରୁ ଡେଇଁ ଦୁଇ ଅଜ୍ଞାତ ଯୁବକ ଗୃହ ଭିତରେ ଗ୍ୟାସ୍ ସ୍ପ୍ରେ କରିଥିଲେ ।

ଆତଙ୍କବାଦୀ ନିରୋଧୀ ସେଲ୍ ଗିରଫ ଯୁବକଙ୍କୁ ପଚରାଉଚରା କରି ଏହି ସବୁ ପ୍ରଶ୍ନର ଉତ୍ତର ଖୋଜୁଛି । ଦିଲ୍ଲୀ ପୋଲିସର ଏକ ସ୍ବତନ୍ତ୍ର ୟୁନିଟ୍‌ ସଂସଦରେ ପହଞ୍ଚି ତଦନ୍ତ ଆରମ୍ଭ କରିଛି । ସେମାନଙ୍କୁ ସଂସଦ ଭିତରକୁ ଯିବା ପାଇଁ ପାସ୍‌ ମିଳିଥିବା ଜଣାପଡିଛି । ଲୋକସଭାରେ ଡେଇଁଥିବା ଜଣେ ବ୍ୟକ୍ତି ନୀଲମ ସିଂ ଅନ୍ୟଜଣକ ଅମୋଲ ସିନ୍ଦେ । ହରିୟାଣ ହିସାରର ନୀଲମ ସିଂ, ବୟସ ୪୨ ବର୍ଷ । ମହାରାଷ୍ଟ୍ର ଲାଟୁରର ଅମୋଲ ସିନ୍ଦେଙ୍କ ବୟସ ୨୫ ବର୍ଷ । ସେପଟେ ଏହା କୌଣସି ଆତଙ୍କବାଦୀ ଆକ୍ରମଣ ନୁହେଁ । ଦୀର୍ଘ ଦିନର ଦାବି ପୂରଣ ହୋଇନଥିବାରୁ ଯୁବକ ପ୍ରତିବାଦ କରିଥିଲେ ବୋଲି କହିଛି ଦିଲ୍ଲୀ ପୋଲିସ ।

ଅଧିକ ପଢନ୍ତୁ : ଲୋକସଭାରେ ଦୁଇ ଅଜ୍ଞାତ ଯୁବକ

୨୦୦୧ ମସିହା ଡିସେମ୍ବର ୧୩ ତାରିଖ ଆଜିର ଦିନରେ ଦେଶର ଗଣତନ୍ତ୍ରର ସର୍ବୋଚ୍ଚ ମନ୍ଦିର ସଂସଦ ଉପରେ ହୋଇଥିଲା ଆତଙ୍କବାଦୀ ଆକ୍ରମଣ । ଏକ ଧଳା ଆମ୍ବାସ୍ୟାଡାର କାରରେ ୫ ଜଣ ଆତଙ୍କବାଦୀ ସଂସଦରେ ପ୍ରବେଶ କରିଥିଲେ । ୪୫ ମିନିଟ ଧରି ଗଣତନ୍ତ୍ରର ସର୍ବୋଚ୍ଚ ମନ୍ଦିରରେ ଗୁଳି ଫୁଟାଇ ଦେଶକୁ ଚକିତ କରି ଦେଇଥିଲେ । ପାଲଟା ଜବାବରେ ସମସ୍ତ ୫ ଆତଙ୍କବାଦୀଙ୍କୁ ନିପାତ କରିଥିଲେ ସୁରକ୍ଷାକର୍ମୀ । ଆତଙ୍କୀ ଆକ୍ରମଣରେ ୨ ଜଣ ସଂସଦ ସୁରକ୍ଷାକର୍ମୀ, ୬ ଜଣ ଯବାନ ଓ ଜଣେ ଡ୍ରାଇଭରଙ୍କ ପ୍ରାଣହାନୀ ଘଟିଥିଲା ।

ସହିଦ ବୀର ଯବାନଙ୍କୁ ସଂସଦ ଭବନ ପରିସରରେ ପହଞ୍ଚି ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହାସହ ଉପରାଷ୍ଟ୍ରପତି ଜଗଦୀପ ଧନଖଡ଼, ଲୋକସଭା ବାଚସ୍ପଚି ଓମ ବିର୍ଲା, କେନ୍ଦ୍ର ଗୃହମନ୍ତ୍ରୀ ଅମିତ ଶାହା, ବିଜେପି ଅଧ୍ୟକ୍ଷ ଜେ.ପି ନଡ୍ଡା, କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ଓ କଂଗ୍ରେସ ସଂସଦୀୟ ଦଳ ଅଧ୍ୟକ୍ଷା ସୋନିଆ ଗାନ୍ଧି ପ୍ରମୁଖ ଶ୍ରଦ୍ଧାଞ୍ଜଳି ଦେଇଛନ୍ତି । କଳା ଦିନକୁ ମନେ ପକାଇବା ସହ X ପୋଷ୍ଟରେ ସହିଦଙ୍କୁ ଶ୍ରଦ୍ଧାଞ୍ଜଳୀ ଜ୍ଞାପନ କରିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ୨୦୦୧ ମସିହା ଆଜିର ଦିନରେ ସଂସଦ ଭବନ ଉପରେ ଆତଙ୍କବାଦୀ ଆକ୍ରମଣ ହୋଇଥିବାରୁ ଏପରି ଆକସ୍ମିକ ଘଟଣାକୁ ନେଇ ଆତଙ୍କିତ ହୋଇପଡ଼ିଥିଲେ ସାଂସଦ ।

Argus English | argus english | Odisha Latest News, Breaking News, Trending News, Live TV