କନ୍ଧମାଳ ଷ୍ଟ୍ରବେରି ଏବେ ରୋଜଗାର ଦେଉଛି
ଅର୍ଗସ ବ୍ୟୁରୋ: କନ୍ଧମାଳ ଷ୍ଟ୍ରବେରି ଏବେ ଲୋକଙ୍କୁ ରୋଜଗାର ଦଉଛି । ଖାଲି ରୋଜଗାର ଦେଉନି, ସ୍ୱାଭିମାନ ସହ ବଞ୍ଚିବାର ରାସ୍ତା ମଧ୍ୟ ଦେଖାଇଛି । କନ୍ଧମାଳ ହଳଦୀ ଭାରତ ରେ ସ୍ବତନ୍ତ୍ର ପରିଚୟ ସୃଷ୍ଟି କରିବା ସହ ଜିଆଇ ଟ୍ୟାଗର ମାନ୍ୟତା ହାସଲ କରିଛି । କିନ୍ତୁ ବର୍ଷ ସାରା ପରିଶ୍ରମ କରିବାକୁ ପଡ଼ିଥାଏ ଓ କେଜି ପ୍ରତି ଚାଷୀ ମାତ୍ର ପଚାଶ ଟଙ୍କା ରେ ବିକ୍ରି କରିଥାଏ । ସେଥିରେ ପୁଣି ସାହୁକାରର ଲୋଲୁପ ଦୃଷ୍ଟି । ସେଥିପାଇଁ ବାଧ୍ୟ ହୋଇ ଗଞ୍ଜେଇ ଚାଷ କରି ଜୀବନ ଓ ଜୀବିକା ନିର୍ବାହ କରିଥାନ୍ତି । କିନ୍ତୁ ପୋଲିସର ନାଲିଆଖି ଓ ଆଇନ୍ କାନୁନ୍ କଟକଣା ହେତୁ ଗଞ୍ଜେଇ ଚାଷୀ କେତେବେଳେ ଜେଲ ତ କେତେବେଳେ ଜରିମାନା ଦେଇ ଦେଇ ହତାଶ ହେବାକୁ ପଡ଼ିଥାଏ । କନ୍ଧମାଳ ଜିଲ୍ଲାରେ ବିଶେଷ କରି ଶୀତଦିନେ ଅତ୍ୟଧିକ ଥଣ୍ଡା ରହୁଥିବାରୁ, ଗତ ବର୍ଷ ଜିଲ୍ଲା ପ୍ରଶାସନ ସହାୟତା ରେ ଆରମ୍ଭ ହୋଇଥିଲା ପରୀକ୍ଷା ମୂଳକ ଭାବରେ ଷ୍ଟ୍ରବେରି ଚାଷ ।
ମାତ୍ର ଦଶ ଏକର ଚାଷ ଜମିରେ ଷ୍ଟ୍ରବେରି ଚାଷ ହୋଇଥିବ ବେଳେ ଉଭୟ ଚାଷୀ ଓ ପ୍ରଶାସନ ସଫଳତା ହାସଲ କରିଥିଲେ । ଚଳିତ ବର୍ଷ କନ୍ଧମାଳ ଜିଲ୍ଲାରେ ପ୍ରାୟ ତିରିଶ ଏକର ଜାଗାରେ ଷ୍ଟ୍ରବେରିଚାଷ ହୋଇଛି । ଉଦ୍ୟାନ ବିଭାଗ ତରଫରୁ ମିଶନ ଶକ୍ତି ଜରିଆରେ କିଛି ସଫଳ ଚାଷୀଙ୍କୁ ଚିହ୍ନଟ କରି, ଆରମ୍ଭ କରାଯାଇଛି ଷ୍ଟବେରି ଚାଷ । ଏଥିପାଇଁ ଚାଷୀ ଙ୍କୁ ଆବଶ୍ୟକ ଚାରା, କ୍ଷେତକୁ ଜଳ ଯୋଗାଣ ବ୍ୟବସ୍ଥା ମଧ୍ୟ କରାଯାଇଛି । ଷ୍ଟ୍ରବେରି ଯେତିକି ସ୍ଵାଦିଷ୍ଟ, ଦେଖିବାକୁ ସେତିକି ସୁନ୍ଦର୍ । ନାଲି ଟହ ଟହ ପାଚିଲା ଫଳ ଦେଖିଲେ ଖାଇବା ଲୋକ ଜମାବି ନ ଖାଇ ରହିପାରିବ ନାହିଁ । ଫୁଲବାଣୀ ବ୍ଲକ୍ ମିନିଆ ପଞ୍ଚାୟତ ଯାରିକି ପଡ଼ା ର ଷ୍ଟବେରି ଚାଷୀ ମାନେ କହିଛନ୍ତି, ଆମେ ଏବେ ସ୍ଵାଧୀନ ସହ ବଞ୍ଚୁଛୁ । ମାତ୍ର ଦୁଇ ମାସ ମଧ୍ୟରେ ଫଳ ଫଳିଥାଏ । କେଜି ପ୍ରତି ପାଞ୍ଚଶହ ଟଙ୍କା ଦରରେ ବିକ୍ରି କରୁଛୁ । ସ୍ଵଳ୍ପ ଖର୍ଚ୍ଚ ଓ ପରିଶ୍ରମ ରେ, ଅଧିକ ଲାଭ ପାଉଥିବାରୁ ଆଉ ଗଞ୍ଜେଇ ଚାଷ କରୁ ନାହୁଁ । ଜେଲ କି ଜୋରିମାନା, ସହ ପୋଲିସ ଜୁଲମ ଆଉ ଆମ ଉପରେ ନାହିଁ । ଅନ୍ୟପଟେ କନ୍ଧମାଳ ଜିଲ୍ଲାପାଳ କହିଛନ୍ତି, ଆଗାମୀ ଦିନରେ ଷ୍ଟ୍ରବେରି କନ୍ଧମାଳ ଜିଲ୍ଲାକୁ ଏକ ସ୍ବତନ୍ତ୍ର ପରିଚୟ ଦେବ । କନ୍ଧମାଳର ଚାଷୀ ମାନେ ଏବେ ଗଞ୍ଜେଇ ଚାଷକୁ ନା, ଷ୍ଟ୍ରବେରି ଚାଷକୁ ହଁ କଲେଣି । ଯାହା ଓଡ଼ିଶା ତଥା କନ୍ଧମାଳ ଜିଲ୍ଲା ପାଇଁ ଏକ ନୂତନ ପ୍ରୟାସ ।
ଅଧିକ ପଢ଼ନ୍ତୁ ଓଡ଼ିଶା ଖବର
