ବରଗଡ: ବରଗଡ଼ ବିଶ୍ୱପ୍ରସିଦ୍ଧ ଧନୁଯାତ୍ରା ଆସନ୍ତା ଜାନୁଆରୀ ୧୫ ତାରିଖରୁ ଆରମ୍ଭ ହେବାକୁ ଥିବାବେଳେ ଗୋପପୁର ଯାତ୍ରା କମିଟି ଦ୍ୱାରା ସ୍ଥାନୀୟ ବୃନ୍ଦାବନ ପଡ଼ିଆଠାରେ ଶୁଭସ୍ତମ୍ଭ ସ୍ଥାପନ ହୋଇଯାଇଛି । ଅମ୍ବାପାଲି ସ୍ଥିତ ସମଲେଶ୍ୱରୀ ମନ୍ଦିରରେ ପାରମ୍ପାରିକ ରୀତିନୀତିରେ ପୂଜା ଅର୍ଚ୍ଚନା କରାଯିବା ସହ  କୃଷ୍ଣ,ବଳରାମ ଓ ରାଧା ଭୁମିକାରେ ମଭିନୟ କରୁଥିବା କଳାକାରଙ୍କୁ ବରଣ କରାଯାଇଥିଲା । ପରେ ମନ୍ଦିରରୁ ଘଣ୍ଟବାଦ୍ୟ , ସଂକୀର୍ତ୍ତନର ତାଳେ ତାଳେ ଏକ ଭବ୍ୟ ଶୋଭାଯାତ୍ରା ଗାଁ ପରିକ୍ରମା କରି ଜୀରା ନଦୀ ତୁଠ ବୃନ୍ଦାବନ ପଡ଼ିଆକୁ ପହଂଚିଥିଲା । 

ସେଠାରେ ନନ୍ଦରାଜଙ୍କ କୂଳପୁରୋହିତଙ୍କ ଦ୍ୱାରା ରୀତିନୀତିରେ ପୂଜା କରାଯାଇ ଗୋପପୁର କମିଟି ସଭାପତି ଉପଜିଳ୍ଳାପାଳ କୁମାର ନାଗଭୂଷଣ  ହାତରେ ଶୁଭସ୍ତମ୍ଭ ସ୍ଥାପନ କରାଯାଇଥିଲା ।  ଶୁଭସ୍ତମ୍ଭ ପରଦିନଠାରୁ ଗୋପପୁର ପାଲଟୁଥିବା ଅମ୍ବାପାଲି ଗାଁରେ ପ୍ରସ୍ତୁତି ଆରମ୍ଭ ହୋଇଯାଇଥିବା ବେଳେ ଏହି ସମୟରେ ସ୍ୱତଃପ୍ରବୃଚା ଭାବେ ଗ୍ରାମବାସୀ କୃଷ୍ଣଭକ୍ତିରେ ମଜ୍ଜି ଯାଇଥାନ୍ତି । ଯେଉଁଥିପାଇଁ ଗାଁରେ ଆମିଷ ବାରଣ କରାଯାଇଥାଏ । 

ଏବେ ଠାରୁ ଯାତ୍ରାକୁ ନେଇ ଗାଁରେ ବେଶ ଉତ୍ସାହ ଦେଖାଦେଇଥିବାବେଳେ କଳାକାରମାନେ ମଧ୍ୟ ଯାତ୍ରା ପାଇଁ ଅଭ୍ୟାସ ଆରମ୍ଭ କରିଦେଇଛନ୍ତି । ଚଳିତ ବର୍ଷ କୃଷ୍ଣ ଭୂମିକାରେ ସମ୍ରାଟ ମହାପାତ୍ର, ବଳରାମ ଭୂମିକାରେ କିଶନ ବିତ୍ତିଆ ଓ ରାଧା ଭୁମିକାରେ ବୈଷ୍ଣବୀ ବିର୍ତ୍ତିଆ ପୁଣିଥରେ ଅଭିନୟ କରୁଥିବା ବେଳେ ବିଗତ ବର୍ଷ ଅପେକ୍ଷା ଏବର୍ଷ ଉନ୍ନତ କଳା ପ୍ରଦର୍ଶନ କରିବେ ବୋଳି ଆଶା କରିଛନ୍ତି ।

ଆହୁରି ପଢନ୍ତୁ ଓଡିଶା ଖବର...