ଆଜି କଂଗ୍ରେସର ବିଧାନସଭା ଘେରାଉ, ରାଜଧାନୀରେ ୮୦ ପ୍ଲାଟୁନ୍ ପୋଲିସ ମୁତୟନ
ଭୁବନେଶ୍ଵର: ବିଧାନସଭା ଚଳାଇ ଦେଲେନି । ବିଶୃଙ୍ଖଳିତ ଆଚରଣ ପାଇଁ କଂଗ୍ରେସ ବିଧାୟକଙ୍କୁ ବାଚସ୍ପତି ନିଲମ୍ବନ କଲେ । ନିଲମ୍ବନ ପରେ ବିଧାନସଭା ଭିତରେ ଓ ବାହାରେ ହାଇଡ୍ରାମା କଲେ । ମାର୍ସଲ ଓ ସୁରକ୍ଷାକର୍ମୀଙ୍କୁ ଆକ୍ରମଣ ବି କଲେ । ଆଉ ଏବେ ବିଧାନସଭା ଘେରାଉ କରିବାକୁ ଚେତାବନୀ ଦେଇଛି କଂଗ୍ରେସ । ଆଜି କଂଗ୍ରେସ ବିଧାନସଭା ଘେରାଉ କରିବାକୁ ଅଣ୍ଟା ଭିଡ଼ିଛି ।
ନାରୀ ନିର୍ଯାତନା ବିରୋଧରେ କଂଗ୍ରେସ ପକ୍ଷରୁ ବିଧାନସଭା ଘେରାଉ କରା ଯାଉଥିବା କୁହାଯାଉଛି । ବିଧାନସଭାର ବଜେଟ୍ ଅଧିବେଶନ ଜାରି ରହିଥିବାରୁ ଘେରାଉକୁ ଦୃଷ୍ଟିରେ ରଖି ସୁରକ୍ଷା ବ୍ୟବସ୍ଥା ବଢ଼ାଇଛି ପୋଲିସ । ବିଧାନସଭାର ୩ ନମ୍ବର ଗେଟ୍ ଆଗରେ ସୁରକ୍ଷା ବ୍ୟବସ୍ଥାକୁ ଆହୁରି କଡ଼ାକଡ଼ି କରାଯାଇଛି ।
କଂଗ୍ରେସର ଘେରାଉ କାର୍ଯ୍ୟକ୍ରମ ପାଇଁ ଆଜି ରାଜଧାନୀରେ ମୁତୟନ ହୋଇଛନ୍ତି ୮୦ ପ୍ଲାଟୁନ୍ ପୋଲିସ ଫୋର୍ସ । ଯେ କେହି ବି ଆଇନ୍ ଉଲ୍ଲଂଘନ କଲେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ଭୁବନେଶ୍ଵର ଡିସିପି ଜଗମୋହନ ମୀନା କହିଛନ୍ତି ।
📱 Get Argus News App
✨
ସୁରକ୍ଷାକୁ ପୋଲିସ ଗୁରୁତ୍ଵ ଦେଇଛି । ଘେରାଉ ସମୟରେ ୧୦ ପ୍ଲାଟୁନ୍ ମହିଳା ପୋଲିସ ନିୟୋଜିତ ରହିବେ । ଏଜି ଛକ, ଲୋକସେବା ଭବନ ଗେଟ , ବିଧାନସଭାର ୪ଟି ଗେଟ, ରବୀନ୍ଦ୍ର ମଣ୍ଡପ ଛକ, ଆଇଆଣ୍ଡପିଆର୍ ଛକ, ଲୋୟର ପିଏମଜି, ମାଷ୍ଟରକ୍ୟାଣ୍ଟିନ ପୋଲିସ ଛାଉଣିରେ ରହିବ । ରାଜମହଲରୁ ରୂପାଲି ଛକ ରାସ୍ତାରେ ଟ୍ରାଫିକ୍ କଟକଣା ଜାରି କରାଯାଇଛି ।