ତୃତୀୟ ଥର ପାଇଁ ପୁରୀ ଜିଲ୍ଲା ବିଜେପି ସଭାପତି ପଦ ଅଳଙ୍କୃତ କଲେ ଆଶ୍ରିତ ପଟ୍ଟନାୟକ

ଅର୍ଗସ ବ୍ୟୁରୋ : ତୃତୀୟ ଥର ପାଇଁ ପୁରୀ ଜିଲ୍ଲା ବିଜେପି ସଭାପତି ପଦ ଅଳଙ୍କୃତ କଲେ ଆଶ୍ରିତ ପଟ୍ଟନାୟକ । ୨୦୨୪ ସାଧାରଣ ନିର୍ବାଚନ ପୂର୍ବରୁ ପିପିଲିରେ ରୋଡ଼ ସୋ କରି ଶକ୍ତି ପ୍ରଦର୍ଶନ କଲା ବିଜେପି । ପୁରୀ ଜିଲ୍ଲା ବିଜେପି ସଭାପତି ଭାବେ ତୃତୀୟ ଥର ବିଜେପି ରାଷ୍ଟ୍ରୀୟ ନେତୃତ୍ବ ଓ ରାଜ୍ୟ ନେତୃତ୍ବ ଆଶ୍ରିତ ପଟ୍ଟନାୟକ ଓରଫ ରିକୁ ପଟ୍ଟନାୟକଙ୍କ ଉପରେ ଆସ୍ଥା ପ୍ରକଟ କରିଛି । ଆଜି ବିଜେପି ପିପିଲିରେ ଶକ୍ତି ପ୍ରଦର୍ଶନ କରି ୨୦୨୪ ନିର୍ବାଚନ ପାଇଁ ରଣ ହୁଙ୍କାର ଦେଇଛି । ଆଗାମୀ ସାଧାରଣ ନିର୍ବାଚନରେ ପୁରୀ ଜିଲ୍ଲାରେ ଛଅ ଗୋଟି ବିଧାନସଭା ଆସନ ଓ ପୁରୀ ଲୋକ ସଭା ଆସନ ଦଖଲ କରିବାର ଦମ୍ଭକ୍ତି ପ୍ରକାଶ କରିଛି ବିଜେପି ।  

ଅଧିକ ପଢନ୍ତୁ ଓଡ଼ିଶା ଖବର

ପିପିଲି ଉତ୍ତରା ଛକ ଠାରୁ ହଜାର ହଜାର ସଂଖ୍ୟାରେ ବାଇକ ଶୋଭା ଯାତ୍ରାରେ ପୁରୀ ଜିଲ୍ଲା ସଭାପତି ଆଶ୍ରିତଙ୍କୁ ସ୍ଵାଗତ କରିଥିଲେ ବିଜେପି କର୍ମୀ । ବାଇକ ଶୋଭାଯାତ୍ରା ପିପିଲି ଉତ୍ତରା ଠାରୁ ବାହାରି ସାତଶଙ୍ଖ ପର୍ଯ୍ୟନ୍ତ ଯାତ୍ରା କରିଥିବା ସମୟରେ ଆଶ୍ରିତଙ୍କୁ  ସ୍ଵାଗତ କରିଥିଲେ । ସେପଟେ ରାଷ୍ଟ୍ରୀୟ ସଭାପତି ଓ ରାଜ୍ୟ ସଭାପତି ପୁଣିଥରେ ଆଶ୍ରିତଙ୍କ ଉପରେ ଭରସା କରିଥିବାରୁ ବିଜେପି ନେତୃତ୍ବଙ୍କୁ ଧନ୍ୟବାଦ ଦେଇଥିଲେ ଆଶ୍ରିତ । 

ଏହି ଶୋଭା ଯାତ୍ରାରେ ଜିଲ୍ଲା ସଭାପତି ଆଶ୍ରିତ ପଟ୍ଟନାୟକ ,ବିଜେପି ରାଷ୍ଟ୍ରୀୟ ପ୍ରବକ୍ତା ସମ୍ବିତ ପାତ୍ର, ବିଜେପି ରାଜ୍ୟ ଉପସଭାପତି ପ୍ରଭାତୀ ପରିଡ଼ା, ବ୍ରହ୍ମଗିରି ବିଧାୟକ ଲଳିତେନ୍ଦୁ ବିଦ୍ୟାଧର ମହାପାତ୍ର ଏବଂ ଯୁବମୋର୍ଚ୍ଚା ସଭାପତି ଜୟନ୍ତ ଦାସ ସାମିଲ ହୋଇଥିଲେ । ଶେଷରେ ସାତଶଂଖ ବଜାର ଠାରେ ଆଶ୍ରିତ ପଟ୍ଟନାୟକଙ୍କୁ ସ୍ୱାଗତ ସମ୍ବର୍ଦ୍ଧନା ଦିଆଯିବା ସହ ଏକ ସଭାମଞ୍ଚର ଆୟୋଜନ ହୋଇଥିଲା । ତେବେ ପ୍ରତି ଛକ ବଜାରରେ ଶହ ଶହ ସଂଖ୍ୟାରେ ମହିଳା ପୁରୁଷ ଆଶ୍ରିତଙ୍କୁ ସ୍ୱାଗତ ସମ୍ବର୍ଦ୍ଧନା ଦେବା ପିପିଲି ରାଜନୀତିକୁ ସରଗରମ କରିଥିବା ବେଳେ ପ୍ରତିଟି ସ୍ଥାନରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି ।