Argus News - ଇଣ୍ଡିଆ ବୁକ୍ ଅଫ୍ ରେକର୍ଡସରେ ସ୍ଥାନ ପାଇଲେ ଆରଭି

ଭୁବନେଶ୍ଵର:  ବୟସ ମାତ୍ର 3 ବର୍ଷ । ହେଲେ ମୁହଁରୁ ବାହାରୁଛି ଅନର୍ଗଳ ଶ୍ଲୋକ । ଖାଲି ଶ୍ଲୋକ ନୁହେଁ ମୁଖସ୍ଥ କରିଛନ୍ତି ହନୁମାନ ଚାଳିଶା, ଜାତୀୟ ସଂଗୀତ, ବନ୍ଦେ ଉତ୍କଳ ଜନନୀ, ସାଧାରଣ ଜ୍ଞାନ ଓ ରାଇମ୍ସ । ଆଉ ତାଙ୍କର ଏହି କୀର୍ତ୍ତିମାନ ପାଇଁ ମାତ୍ର 3 ବର୍ଷ ବୟସରେ ଇଣ୍ଡିଆ ବୁକ୍ ଅଫ୍ ରେକର୍ଡସରେ ସ୍ଥାନ ପାଇଛନ୍ତି । 

ଏହି କୁନି ବିସ୍ମୟ ଶିଶୁ କନ୍ୟା ହେଉଛନ୍ତି ଆରଭି ୟୁଭାନିକା । ବୟସ ମାତ୍ର 3 ବର୍ଷ 3 ମାସ । ଏହି ବୟସରେ ଆରଭି ଭାରତର 28 ରାଜ୍ୟ, ତାହାର ରାଜଧାନୀ, 16ଟି ଶବ୍ଦର ବିପରୀତ ଶବ୍ଦ,12 ଜଣ କବି ଓ ସେମାନଙ୍କ ଉପାଧିଙ୍କ ନାମ, 9 ଜଣ ସ୍ୱାଧୀନତା ଦେଶ ପ୍ରେମ ସ୍ଲୋଗାନ, 10 ଜଣ ଲେଖକ ରଚନା କରିଥିବା ଗ୍ରନ୍ଥ ଓ ଉପନ୍ୟାସର ନାମ, 12 ଟି ରଙ୍ଗର ନାମ ଓ ଇଂରାଜୀ 12 ମାସର ନାମ, 6 ଋତୁ, ସପ୍ତାହର 7 ଦିନ ର ନାମ, 16 ଟି ଶିଶୁ ବାଟିକା ପଦ୍ୟ ଆବୃତ୍ତି, 9ଟି କ୍ଷେତ୍ରର ନାମ, 26ଟି ଇଂରାଜୀ ବର୍ଣ୍ଣମାଳାର ପ୍ରତୀକ, 7 ଟି ମହାଦେଶ ଓ 8 ଟି କେନ୍ଦ୍ରଶାସିତ ରାଜ୍ୟର ନାମ, 9 ଟି ଗ୍ରହ ଓ ମଣିଷ ଶରୀରର 25 ଟି ଅଙ୍ଗ ପ୍ରତ୍ୟେଙ୍ଗ ର ନାମ, 20ଟି ଫଳର ନାମ ଓ 25ଟି ପଶୁର ନାମ, 20 ଟି ପନିପରିବାର ନାମ, ଇଂରାଜୀରେ 30ଟି ଜରୁରୀକାଳୀନ ଶବ୍ଦ, ସଂଖ୍ୟା ଗଣନା ଓ ଜରୁରୀ କାଳୀନ ଶବ୍ଦ, ବନ୍ଦେ ଉତ୍କଳ ଜନନୀ ଗାନ, 4 ଟି ସଂସ୍କୃତ ଶ୍ଳୋକ ଓ ହନୁମାନ ଚାଳିଶା ପଠନ, 47 ଟି ସାଧାରଣ ଜ୍ଞାନ ପ୍ରଶ୍ନ କହି ଇଣ୍ଡିଆ ବୁକ ଅଫ ରେକର୍ଡରେ ସ୍ଥାନ ପାଇଛନ୍ତି ଆରଭି । 

ସମ୍ପୃକ୍ତ ଶିଶୁ କନ୍ୟା ସ୍ୱାସ୍ଥ୍ୟ ବିଭାଗରେ କାର୍ଯ୍ୟରତ ଯୁବ ଇଞ୍ଜିନିୟର ଚନ୍ଦନ ରାଉତ ଓ ମାତା ଇଞ୍ଜିନିୟର ସ୍ୱପ୍ନାଶ୍ରୀ ସାମଲଙ୍କ ଝିଅ । ଆଗକୁ ଏସିଆ ଓ ୱାର୍ଲଡ ରେକର୍ଡରେ ସ୍ଥାନ ପାଇବା ନେଇ ଆଶାବାଦୀ ଅଛନ୍ତି ଆରଭିର ମାତା ପିତା ।

ଆରଭିର ଏହି ସଫଳତା ପାଇଁ ପରିବାର ବେଶ ଖୁସି ପ୍ରକଟ କରିବା ସହ ଆଗକୁ ଉତ୍ତୋରତର ଉନ୍ନତି କରୁ ଏହି କାମନା କରିଛନ୍ତି।