ଖୋର୍ଦ୍ଧା:  ଚାଷ କରି ଚିନ୍ତାରେ ଚାଷୀ । କେଉଁଠି କ୍ଷେତରେ ପଡ଼ି ନଷ୍ଟ ହେଉଛି ତ ଆଉ କୋଉଠି ଗାଈ ଖାଉଛନ୍ତି ଫୁଲ କୋବି।  ଶୀତଳ ଭଣ୍ଡାରର ଅଭାବ ଏବଂ ବଜାରରେ ଚାହିଦା ନଥିବାରୁ ମୁଣ୍ଡରେ ହାତ ଦେଇ ବସିଛି ଚାଷୀ। ଶେଷରେ ବାଧ୍ୟ ହୋଇ ହଜାର ହଜାର ଟଙ୍କା ବିନିଯୋଗରେ ଚାଷ କରିଥିବା ଫୁଲ କୋବିକୁ ଗାଈକୁ ଖୁଆଉଛନ୍ତି । ଏପଟେ ଅଦିନିଆ ବର୍ଷା ଦାଉ ସାଧିଥିବା ବେଳେ କୋବି ଗୋଟାକୁ ଦୁଇ ଟଙ୍କାରେ କିଣିବା ପାଇଁ ବି ଅମଙ୍ଗ ହେଉଛନ୍ତି ଗ୍ରାହକ ।

ସରକାରଙ୍କ ଉଦାସୀନତା କାରଣରୁ ଶୀତଳଭଣ୍ଡାରର ଅଭାବ ପାଇଁ ଚାଷୀ ହନ୍ତସନ୍ତ ହେଉଛନ୍ତି। ଖୋର୍ଧା,ନୟାଗଡ଼ ଏବଂ ନିଆଳିରେ ଦେଖିବାକୁ ମିଳିଛି ଏଭଳି ଅଭାବନୀୟ ଚିତ୍ର। ରାଜଧାନୀରେ ଫୁଲ କୋବି ଗୋଟା 20 ଟଙ୍କାରେ ବିକ୍ରି ହେଉଥିବା ବେଳେ ପାଖ ଅଞ୍ଚଳମାନଙ୍କରେ ଅଭାବୀ ବିକ୍ରି ଦେଖା ଦେଇଛି । ସେପଟେ ନିକଟରେ ରାଜ୍ୟପାଳ ରଘୁବର ଦାସଙ୍କ ଯାଜପୁର ଗସ୍ତ ବେଳେ ଶୀତଳଭଣ୍ଡାରର ଅଭାବ ପାଇଁ ଉଦବେଗ ପ୍ରକାଶ କରିଥିଲେ ରାଜ୍ୟପାଳ। ସେ କହିଥିଲେ ଓଡିଶା ଚାଷୀ କ୍ଷେତରେ ଝାଳ ବୁହାଇ ସୁନାର ଫସଲ ଉତ୍ପାଦନ କରୁଛି ।  ହେଲେ ସାଇତିବା ପାଇଁ ଶୀତଳ ଭଣ୍ଡାର ନାହିଁ। ଅଧିକ ଉତ୍ପାଦନ ହେଲେ ଶାଗମାଛ ଦରରେ ବିକୁଛି ନ ହେଲେ ସେଇ ବିଲରେ ହିଁ ନଷ୍ଟ ହେଉଛି ଫସଲ। 
 

ଅଧିକ ପଢନ୍ତୁ ଓଡ଼ିଶା ଖବର