ପଞ୍ଚଗାଁ ଖେଳପଡିଆ ଉନ୍ନତିକରଣ ପାଇଁ 50 ଲକ୍ଷ ଟଙ୍କାର ଅନୁଦାନ
ପୁରୀ: ଓଡ଼ିଶା ଗସ୍ତରେ ଆସି ଆଠଗଡ଼କୁ ନୂଆବର୍ଷ ଭେଟି ଦେଇଛନ୍ତି ରେଳମନ୍ତ୍ରୀ ଅଶ୍ବିନୀ ବୈଷ୍ଣବ ।.. ଘଣ୍ଟିଖାଲ ଫ୍ଲାଏ ଓଭରବ୍ରିଜ୍ ହେବ । ଟଙ୍କା ମଞ୍ଜୁର ହୋଇସାରିଛି ଖୁବଶୀଘ୍ର କାମ ଆରମ୍ଭ ହେବ । ଘଣ୍ଟିଖାଲ ଏବଂ ରାଜା ଆଠଗଡ ରେଲୱେ ଷ୍ଟେସନର ହେବ ଉନ୍ନତିକରଣ । ଏପରି ଘୋଷଣା କରିଛନ୍ତି ଅଶ୍ବିନୀ ବୈଷ୍ଣବ । ଏଥିସହ ପଞ୍ଚଗାଁ ଫୁଟବଲ ଟୁର୍ଣ୍ଣାମେଣ୍ଟରେ ସାମିଲ୍ ହୋଇ ଖେଳପଡିଆର ଉନ୍ନତିକରଣ ପାଇଁ 50 ଲକ୍ଷ ଟଙ୍କାର ଅନୁଦାନ ଘୋଷଣା କରିଛନ୍ତି ରେଳମନ୍ତ୍ରୀ । ଏହା ପୂର୍ବରୁ ବାବା ଧବଳେଶ୍ଵରଙ୍କ ଦର୍ଶନ ସହ ପର୍ଯ୍ୟଟନସ୍ଥଳୀର ବିକାଶ ପ୍ରତି ଗୁରୁତ୍ବାରୋପ କରିଥିଲେ । ଶେଷରେ ବଡମ୍ବା ନିର୍ବାଚନ ମଣ୍ଡଳୀରେ ମାଆ ଭଟ୍ଟାରିକାଙ୍କ ଦର୍ଶନ କରିବା ସହ ମନ୍ଦିର ଉନ୍ନତି ପାଇଁ ଦୁଇ ଲକ୍ଷ ଟଙ୍କା ଘୋଷଣା କରିଛନ୍ତି ଅଶ୍ବିନୀ ବୈଷ୍ଣବ ।
ଏହାସହ ଅନ୍ୟାନ୍ୟ କାର୍ଯ୍ୟକ୍ରମରେ ଯୋଗଦେଇ ମୋଦି ଗ୍ୟାରେଣ୍ଟି କଥା କହିଛନ୍ତି ଅଶ୍ବିନୀ । ସେପଟେ ଓଡ଼ିଶା ଗସ୍ତରେ ଆସିଥିବା କେନ୍ଦ୍ରମନ୍ତ୍ରୀ ପରଷୋତ୍ତମ ରୂପାଲା ଗଞ୍ଜାମ ଆର୍ଯ୍ୟପଲ୍ଲୀରେ ଆୟୋଜିତ ସାଗର ପରିକ୍ରମା ଏକାଦଶ ପର୍ଯ୍ୟାୟ କାର୍ଯ୍ୟକ୍ରମରେ ଯୋଗଦେଇଥିଲେ । ଉପକୂଳ ମତ୍ସ୍ୟଜୀବୀ, ମତ୍ସ୍ୟ ଚାଷୀ ଓ ଯୁବ ମତ୍ସ୍ୟ ଉଦ୍ୟୋଗୀଙ୍କୁ କିଷାନ କ୍ରେଡିଟ୍ କାର୍ଡ ବଣ୍ଟନ କରିଥିଲେ । ପରେ ନଇରି ଗାଁ ଏବଂ ବାଲୁଗାଁ ଗସ୍ତ କରି ସ୍ଥାନୀୟ ମତ୍ସ୍ୟଜୀବୀଙ୍କ ସହ ଆଲୋଚନା କରିଥିଲେ କେନ୍ଦ୍ରମନ୍ତ୍ରୀ । ଆଜି ପୁରୀ ଗସ୍ତରେ ଆସି ମହାପ୍ରଭୁଙ୍କ ଦର୍ଶନ କରିଛନ୍ତି ଗୋଆ ମୁଖ୍ୟମନ୍ତ୍ରୀ ପ୍ରମୋଦ ସାୱାନ୍ତ । ଦୀର୍ଘ ବର୍ଷ ପରେ ସପରିବାର ସହ ମହାପ୍ରଭୁଙ୍କ ଦର୍ଶନ କରି ସେ ଭାବବିହ୍ବଳ ହୋଇପଡିଥିଲେ ।
ଅଧିକ ପଢନ୍ତୁ ଓଡ଼ିଶା ଖବର
