ଅର୍ଗସ ବ୍ୟୁରୋ: ସଭିଏଁ ପଢନ୍ତୁ, ସଭିଏଁ ବଢନ୍ତୁ । ଏ ନାରା କେବଳ ଲୋକଙ୍କୁ ଦେଖାଇବାକୁ । ପ୍ରକୃତରେ ବିଜେଡି ସରକାର ଚାହେଁନି କି ପିଲାମାନେ ଭଲରେ ପଢନ୍ତୁ । ଆଉ ନୁହେଁ ତ କଣ ? ପାଣ୍ଡିଆନଙ୍କ ଗସ୍ତ ପାଇଁ କେମିତି ପରୀକ୍ଷା ବାତିଲ ହେଲା ବୋଲି କଲେଜ କର୍ତ୍ତୃପକ୍ଷ ନୋଟିସ ଜାରି କରିଛନ୍ତି । ତେବେ ସରକାରୀ କାର୍ଯ୍ୟକ୍ରମ ପାଇଁ ପିଲାଙ୍କ ଭବିଷ୍ୟତ ସହ କାହିଁକି ଖେଳୁଛନ୍ତି ରାଜ୍ୟ ସରକାର ?

ଏବେ ପୁଣି ଥରେ ରାଜ୍ୟୱାରୀ ଗସ୍ତ କରୁଛନ୍ତି ଫାଇଭ-ଟି ଅଧ୍ୟକ୍ଷ ଭି.କେ ପାଣ୍ଡିଆନ । କେଉଁଠି ଆମ ଓଡ଼ିଶା ନବୀନ ଓଡ଼ିଶା କାର୍ଯ୍ୟକ୍ରମରେ ଯୋଗ ଦେଉଛନ୍ତି ତ ଆଉ କେଉଁଠି ନୂଆ ଓ କାର୍ଯ୍ୟକ୍ରମରେ ସାମିଲ ହେଉଛନ୍ତି । ହେଲେ ପାଣ୍ଡିଆନଙ୍କ ପୋଗ୍ରାମ ଲାଗି ଯେମିତି ଭାବରେ ପିଲାଙ୍କ ପରୀକ୍ଷା ଘୁଞ୍ଚିଲା ତାହାକୁ ନେଇ ସମ୍ବଲପୁରରେ ତେଜିବାରେ ଲାଗିଲାଣି ଅସନ୍ତୋଷ । ମିଳିଥିବା ସୂଚନା ଅନୁସାରେ, ଆସନ୍ତାକାଲି ଜିଏମ୍ ୟୁନିଭରସିଟିରେ ପରୀକ୍ଷା ହେବାର ଥିଲା। ହେଲେ ଆସନ୍ତାକାଲି ସମ୍ବଲପୁର ମନ୍ଦୋଲିଆ ଗ୍ରାଉଣ୍ଡରେ ନୂଆ ଓ କାର୍ଯ୍ୟକ୍ରମ ହେବାର ଅଛି । ତେଣୁ ପରୀକ୍ଷା ଘୁଞ୍ଚାଇବାକୁ ଜିଲ୍ଲା ପରିଷଦ ପକ୍ଷରୁ ୟୁନିଭରସିଟିକୁ ଚିଠି ଲେଖାଯାଇଥିଲା । ଏହା ପରେ ସମ୍ବଲପୁର ଜିଏମ୍ ୟୁନିଭରିସିଟିର ପରୀକ୍ଷା ଘୁଞ୍ଚିଛି । ଆସନ୍ତାକାଲି ହେବାକୁ ଥିବା ପରୀକ୍ଷା ୨୪ ତାରିଖରେ ହେବ ବୋଲି ବିଜ୍ଞପ୍ତି ପ୍ରକାଶ ପାଇଛି । 

ତେବେ ପାଣ୍ଡିଆନଙ୍କ କାର୍ଯ୍ୟକ୍ରମରେ ବହୁତ ଭିଡ଼ ହେବାର ସମ୍ଭାବନା ଥିବାରୁ ଯେଉଁ ଛାତ୍ରଛାତ୍ରୀ SAMS ପୋର୍ଟାଲରେ ପଂଜୀକୃତ ହୋଇଥିବେ, କେବଳ ସେମାନେ ଏହି କାର୍ଯ୍ୟକ୍ରମରେ ଭାଗ ନେଇପାରିବେ ବୋଲି ଜିଲ୍ଲା ପରିଷଦ ସମ୍ବଲପୁର ପକ୍ଷରୁ କୁହାଯାଇଛି । ତେବେ ଫାଇଭ-ଟି ଅଧ୍ୟକ୍ଷଙ୍କ ଗସ୍ତକୁ ନଜରରେ ରଖି ଯେମିତି ଭାବରେ ପରୀକ୍ଷୀ ଘୁଞ୍ଚିଲା ତାହାକୁ ନେଇ ଏବେ ସବୁଠି ଚର୍ଚ୍ଚା ।

(ସମ୍ବଲପୁରରୁ ମଳୟ ଭୋଇଙ୍କ ରିପୋର୍ଟ)