Argus News - ଶିକ୍ଷାର ମହତ୍ତ୍ୱ ବୁଝିଛନ୍ତି ନାରାୟଣୀ ଟିଚର୍...

ଅର୍ଗସ ବ୍ୟୁରୋ:  ପ୍ରତିଦିନ 25 କିମି ଚାଲି ଚାଲି ସେ ପିଲାଙ୍କୁ ପାଠ ପଢାନ୍ତି । ବୟସ, ଖରାପ ପାଗ, କି ପରିବର୍ତ୍ତନ ହେଉଥିବା ସିଲାବସରେ ତାଙ୍କୁ  ଫରକ ପଡେନି । ଯେତେ ଖରା, ଶୀତ,ବର୍ଷା ହେଉ ନା କାହିଁକି ସେ କାନ୍ଧରେ ବ୍ୟାଗଟିଏ ଆଉ ହାତରେ ଛତାଟିଏ ଧରି ସଅଳ ସଅଳ ବାହାରି ପଡନ୍ତି ପିଲାଙ୍କୁ ପଢାଇବାକୁ । ଆଖପାଖ ଲୋକ ତାଙ୍କୁ ନାରାୟଣୀ ଟିଚର୍ ବୋଲି କୁହନ୍ତି ।  

ତାଙ୍କ ଦିନ ଆରମ୍ଭ ହୁଏ ସକାଳ 4.30 ରେ । ଆଉ 6.30 ସୁଦ୍ଧା ସେ ପ୍ରଥମ ଘରେ ଟିଉସନ କରାଇବାକୁ ପହଞ୍ଚି ଯାଆନ୍ତି ।  ଆଉ ସେତେବେଳୁ ସେ ଗୋଟିଏ ପରେ ଗୋଟିଏ ଘରକୁ ଚାଲି ଚାଲି ଟିଉସନ କରିବାକୁ ଯାଆନ୍ତି । ଟିଉସନ ସାରି ଘରେ ପହଞ୍ଚିବା ବେଳକୁ ହୋଇଯାଏ ରାତି । 

ନାରାୟଣୀ ଟିଚର୍ 1971 ମସିହାରେ ଦଶମ ପାସ କରିଥିଲେ । କେବେ ବି କଲେଜ ମାଟି ମାଡିନାହାନ୍ତି । ହେଲେ ତାଙ୍କୁ 4ଟି ଭାଷା ଆସେ । ଇଂରାଜୀ,ମାଲାୟଲମ, ହିନ୍ଦୀ ଓ ସଂସ୍କୃତରେ ସେ ପାରଙ୍ଗମ । ସେ 15 ବର୍ଷ ବୟସରୁ ପାଠ ପଢାଇବା ଆରମ୍ଭ କରିଥିଲେ । କିନ୍ତୁ ସ୍କୁଲ ଟିଚର୍ ନଥିଲେ । 

ଗତ 50 ବର୍ଷ ହେଲାଣି ସେ ଶିକ୍ଷକତା କରୁଛନ୍ତି । ଆଉ ତାଙ୍କର ସମସ୍ତଙ୍କ ଛାତ୍ର ସେ ପଠାଉଥିବା ବିଷୟରେ ଭଲ ମାର୍କ ରଖନ୍ତି ବୋଲି କହିଛନ୍ତି ନାରାୟଣୀ ଟିଚର୍ । 
ଏନେଇ ନାରାୟଣୀ ଟିଚର୍ କୁହନ୍ତି ଯେ ପର୍ଯ୍ୟନ୍ତ ମୋ ସ୍ୱାସ୍ଥ୍ୟ ଭଲ ଅଛି ସେତେବେଳ ଯାଏଁ ମୁଁ ଏମିତି ଚାଲି ଚାଲି ଯିବି ପିଲାଙ୍କୁ ପାଠ ପଢାଇବି । ଏପରିକି ସେ କୋରୋନା ସମୟରେ ବି ପିଲାଙ୍କ କ୍ଲାସ ବନ୍ଦ କରିନାହାନ୍ତି । ଲକଡାଉନରେ ବି ପିଲାଙ୍କୁ ପାଠ ପଢାଇଛନ୍ତି । 

କେରଳର କାସରଗୁଡ ଅଞ୍ଚଳରେ ଏକ ଭଡା ଘରେ ରୁହନ୍ତି ନାରାୟଣୀ ଟିଚର୍ ଏବଂ ତାଙ୍କ ସ୍ୱାମୀ । ଆଉ ତାଙ୍କର ଏକ ସ୍ୱପ୍ନ ହେଉଛି କିପରି ଘଡା ଘରୁ ନିଜର ଏକ ଘର ଟିଏ କରିବେ । ଭଲରେ ରହିବେ । 

ବୁଝିଛନ୍ତି ଶିକ୍ଷାର ମହତ୍ତ୍ୱ । ଜାଣିଛନ୍ତି ପାଠ ଦି ଅକ୍ଷର ପଢିଥିଲେ ଖାଲି ନିଜେ ନୁହେଁ ଗୋଟେ ପରିବାର, ଗୋଟେ ସମାଜ ଶିକ୍ଷିତ ହେବ । ସେଥିପାଇଁ ତ 65 ବର୍ଷ ବୟସରେ ବି ସେ ଘର ଘର ବୁଲି ପିଲାଙ୍କୁ ପାଠ ପଢାଉଛନ୍ତି ।