ଅର୍ଗସ ବ୍ୟୁରୋ: ଇତିହାସରେ ସ୍ୱର୍ଣ୍ଣ ଅକ୍ଷରରେ ଲିପିବଦ୍ଧ ହେବ ଜାନୁଆରୀ 22, 2024 । ସେହିଦିନ ଭଗବାନ ଶ୍ରୀରାମ ଭବ୍ୟ ମନ୍ଦିରରେ ବିରାଜମାନ କରିବେ । ରାମଲାଲାଙ୍କ ପ୍ରାଣପ୍ରତିଷ୍ଠା କାର୍ଯ୍ୟ ଜୋର ସୋର୍ ରେ ଚାଲିଛି । ତାରିଖ ଯେତେ ପାଖେଇ ଆସୁଛି ପ୍ରସ୍ତୁତି ମଧ୍ୟ ସେତେ ଜୋର ସୋରରେ ଚାଲିଛି ।  

2024 ନୂତନ ବର୍ଷରେ, ରାମଲାଲାଙ୍କୁ ଅର୍ପଣ କରାଯିବ 56 ଭୋଗ । ଯେଉଁଥିପାଇଁ ଲକ୍ଷ୍ନୌର ଜଣେ ରାମ ଭକ୍ତ 56 ଭୋଗ ସହ ଅଯୋଧ୍ୟାରେ ପହଞ୍ଚିଛନ୍ତି । ଅତି ଯତନେ ସୁନ୍ଦର ଭାବରେ ସଜେଇ 56 ଭୋଗ ଶ୍ରୀରାମଙ୍କ ପାଇଁ ଆଣିଛନ୍ତି । ଏଥିରେ 56 ପ୍ରକାରର ବ୍ୟଞ୍ଜନ ରହିଛି । ଯଥା ବିଭିନ୍ନ ପ୍ରକାରର ମିଠା, ମିସ୍ରି, ନମକିନ୍ । ତେବେ ଏହାକୁ ସେ ରାମଲାଲାଙ୍କ ମୁଖ୍ୟ ପୁରୋହିତ ଆଚାର୍ଯ୍ୟ ସତ୍ୟେନ୍ଦ୍ର ଦାସଙ୍କ ନିକଟରେ ଉପସ୍ଥାପନ କରିଛନ୍ତି । 

ରାମ ଭକ୍ତ ସୁଜଲ ଗୁପ୍ତାଙ୍କ କହିବାନୁଯାୟୀ ଯେବେଠୁ ରାମଲାଲା ଅସ୍ଥାୟୀ ମନ୍ଦିରରେ ପୂଜା ପାଉଥିଲେ ସେବେଠୁ ସେ ପ୍ରତିବର୍ଷ ନୂଆବର୍ଷରେ ରାମଲାଲାଙ୍କୁ 56 ଭୋଗ ଚଢାଇବା ପାଇଁ ସଂକଳ୍ପ ନେଇଥିଲେ । ଆଉ ପ୍ରତିବର୍ଷ ସେ ସାଙ୍ଗରେ ରାମଲାଲଙ୍କୁ ଚଢାଇବା ପାଇଁ 56 ଭୋଗ ସାଙ୍ଗରେ ଆଣିଥାନ୍ତି । 22 ଜାନୁଆରୀରେ ରାମଲାଲା ଭବ୍ୟ ମନ୍ଦିରର ଗର୍ଭଗୃହରେ ବିରାଜମାନ ହେବାକୁ ଯାଉଛନ୍ତି । ସେହିଦିନ ମଧ୍ୟ ସେ ରାମଲାଲାଙ୍କୁ 56 ଭୋଗ ଚଢାଇବେ ବୋଲି କହିଛନ୍ତି । 

ରାମଲାଲାଙ୍କ ମୁଖ୍ୟ ପୁରୋହିତ ଆଚାର୍ଯ୍ୟ ସତ୍ୟେନ୍ଦ୍ର ଦାସ କହିଛନ୍ତି ଯେ ଅଯୋଧ୍ୟା ପାଇଁ 2024 ଏକ ଗୁରୁତ୍ୱପୂର୍ଣ୍ଣ ବର୍ଷ । ଏଥିରେ ଅନେକ ଗୁରୁତ୍ୱପୂର୍ଣ୍ଣ କାର୍ଯ୍ୟ ମଧ୍ୟ ହେବାକୁ ଯାଉଛି । ତେବେ ନବବର୍ଷରେ ବହୁ ସଂଖ୍ୟାରେ ଶ୍ରଦ୍ଧାଳୁ ଅଯୋଧ୍ୟା ଗସ୍ତ କରୁଛନ୍ତି । ଭଗବାନଙ୍କ ନିକଟରେ ନୂଆବର୍ଷ ଯେପରି ଭଲରେ କଟିବ ସେନେଇ ପ୍ରାର୍ଥନା କରୁଛନ୍ତି । 

ଜାନୁଆରୀ 22 ରେ ପ୍ରଭୁ ଶ୍ରୀରାମଙ୍କର ପ୍ରାଣ ପ୍ରତିଷ୍ଠାର ଶୁଭ ମୁହୂର୍ତ୍ତ 12: 29: 8 ରୁ 12:30:32 84 ସେକେଣ୍ଡ ପର୍ଯ୍ୟନ୍ତ ରହିବ। ରାମ ମନ୍ଦିର ପ୍ରାଣ ପ୍ରତିଷ୍ଠା କାର୍ଯ୍ୟକ୍ରମରେ ହଜାର ହଜାର ସଂଖ୍ୟାରେ ଅତିଥିଙ୍କୁ ନିମନ୍ତ୍ରଣ କରାଯାଇଛି । ଲକ୍ଷ ଲକ୍ଷ ଜନତାଙ୍କ ସମାଗମ ହେବାକୁ ଯାଉଛି ।