ଅର୍ଗସ ବ୍ୟୁରୋ: ଅଯୋଧ୍ୟା ରାମ ମନ୍ଦିରର ଭବ୍ୟ ପ୍ରାଣ ପ୍ରତିଷ୍ଠା ଆସନ୍ତା ଜାନୁୟାରୀ ୨୨ ତାରିଖରେ ହେବ। ଏଥିପାଇଁ ପୁରା ଦେଶରେ ଉତ୍ସାହର ମାହୋଲ। ତେବେ ରାମ ମନ୍ଦିର ପ୍ରତିଷ୍ଠା ଦିନ ହିଁ ପ୍ରତିଷ୍ଠା ହେବ ଓଡ଼ିଶାର ଏକ ଭବ୍ୟ ରାମ ମନ୍ଦିର l ରାମ ଭକ୍ତଙ୍କ ପାଇଁ ଅପେକ୍ଷା କରିଛି ନୟାଗଡ଼ ଜିଲ୍ଲାସ୍ଥିତ ରାମ ମନ୍ଦିର l ଅଯୋଧ୍ୟାର ଭ୍ରମ ସୃଷ୍ଟି କରୁଛି ଏହି ମନ୍ଦିର। ସୋସିଆଲ ମିଡିଆରେ ଭାଇରାଲ ହେଉଛି ଏହି ରାମ ମନ୍ଦିରର ଭିଡିଓ। ଚାଲନ୍ତୁ ଜାଣିବା ଏହି ମନ୍ଦିର ବିଷୟରେ କିଛି ସୁନ୍ଦର ତଥ୍ୟ।
ପାହାଡ଼ ଶୀର୍ଷରେ ରାମ ମନ୍ଦିର l ଆଖି ଲାଖି ଗଲା ପରି ମନ୍ଦିର l ପ୍ରାକୃତିକ ପରିବେଶରେ ପର୍ଯ୍ୟଟକଙ୍କ ଅପେକ୍ଷାରେ ରହିଛି ଏହି ମନ୍ଦିର l

ରାମଙ୍କ ଦର୍ଶନ ସହ ଲକ୍ଷ୍ମଣ, ସୀତା ଏବଂ ହନୁମାନଙ୍କର ମିଳିବ ଦର୍ଶନ l କେବଳ ସେତିକି ନୁହେଁ ମୁଖ୍ୟ ଦେବାଦେବିଙ୍କ ଦର୍ଶନ ସହ କିଛି ସମୟ ଦେବଲୋକର ଭ୍ରମ ସୃଷ୍ଟି କରିବ। ନୟାଗଡ଼ ଜିଲ୍ଲା ଭାପୁର ବ୍ଲକ ଫତେଗଡ଼ ପାହାଡ ଶୀର୍ଷରେ ରହିଛି ଏହି ଅଯୋଧ୍ୟା ରୁପି ସ୍ଥାନ l ଫତେଗଡ ଗ୍ରାମବାସୀ ଓ ଶ୍ରୀରାମ ସେବା ପରିଷଦ ନିଜସ୍ବ ପୁଞ୍ଜିରେ ନିର୍ମାଣ କରିଛନ୍ତି ଭବ୍ୟ ରାମ ମନ୍ଦିର l ଗ୍ରାମବାସୀଙ୍କ ଉଦ୍ୟମରେ ଏଠି ନିର୍ମାଣ ହୋଇଛି ମର୍ଯ୍ୟାଦା ପୁରୁଷ ଶ୍ରୀ ରାମଚନ୍ଦ୍ରଙ୍କ ମନ୍ଦିର l ରାଜ୍ୟ ତଥା ରାଜ୍ୟ ବାହାରର ବଛା ବଛା କାରିଗର ମନ୍ଦିର ନିର୍ମାଣ କରିଛନ୍ତି l ରେଖ, ଭଦ୍ର , ମୋହନ ଢାଞ୍ଚାରେ ତିଆରି ହୋଇଥିବା ଏହି ମନ୍ଦିରର ଉଚ୍ଚତା ପ୍ରାୟ 65 ଫୁଟ l ରେଖର ଉଚ୍ଚତା 65, ଭଦ୍ରର 35 ଓ ମୋହନର ଉଚ୍ଚତା 25 ଫୁଟ ରହିଛି l ମନ୍ଦିରରେ ପୁରୀ, କୋଣାର୍କ ମନ୍ଦିରର କାରୁକାର୍ଯ୍ୟ ଦେଖିବାକୁ ମିଳୁଛି l କେବଳ ବଉଳମାଳା ପଥରରେ ନିର୍ମାଣ ହୋଇଛି ମନ୍ଦିର ଏବଂ ଚତୁଃପାର୍ଶ୍ୱ ପାର୍ଶ୍ବଦେବାଦେବୀଙ୍କ ମୂର୍ତ୍ତି ସଭିଙ୍କୁ କରିବ ଆନମନା l ସାଧୁସନ୍ଥଙ୍କ ମନ୍ତ୍ରପାଠରେ ଗୁଞ୍ଜରିତ ହେବ ଚତୁଃପାର୍ଶ୍ୱ l ଏଥିରେ ପୁରୀ ଶଙ୍କରାଚାର୍ଯ୍ୟ ଏବଂ ଗଜପତି ମହାରାଜା ଯୋଗଦେବେ l ଅଯୋଧ୍ୟା ଭଳି ପ୍ରତିଷ୍ଠା ଉତ୍ସବକୁ ଖୁବ ଆଡ଼ମ୍ବର ସହକାରେ କରାଯିବ l ପ୍ରତିଷ୍ଠା ପରେ ପ୍ରଥମେ ରାମଙ୍କୁ ଦର୍ଶନ କରିବେ ଶଙ୍କରାଚାର୍ଯ୍ୟ l

ତେବେ କେମିତି ଯିବେ ଏହି ସ୍ଥାନକୁ ନୟାଗଡରୁ ପ୍ରାୟ 35 କିଲୋମିଟର ଏବଂ ଭୁବନେଶ୍ୱରରୁ 70 କିଲୋମିଟର ଦୂର ହେବ ଏହି ଫତେଗଡ଼ ସ୍ଥିତ ଶ୍ରୀରାମ ମନ୍ଦିର l ମନ୍ଦିର ନିର୍ମାଣ ପୂର୍ବରୁ ଏହି ପାହାଡ ଉପରେ ଭାଗବତ ପୀଠ ଥିଲା l ବିଶ୍ବାସ ରହିଛି, ଗାଁରେ ବର୍ଷା ହେବା ପାଇଁ ଏଠାରେ ପୂଜା କରାଯାଉଥିଲା l ସେହି ବିଶ୍ୱାସକୁ ଆଧାର କରି, ଠାକୁର ଏହି ଠାରେ ରହୁଥିବାରୁ ଏଠାରେ ଏକ ମନ୍ଦିର ନିର୍ମାଣ ପାଇଁ ଗ୍ରାମବାସୀ ସ୍ବପ୍ନ ଦେଖିଥିଲେ l ତେଣୁ ଏବେ ପାହାଡ କାଟି ଏଠାରେ ମନ୍ଦିର ତିଆରି କରିଛନ୍ତି ଗ୍ରାମବାସୀ l ନିଖୁଣ କାରିଗରୀ ଦେଖିବାକୁ ମିଳୁଛି l ମନ୍ଦିରର ଶୋଭାକୁ ଦ୍ବିଗୁଣିତ କରୁଛି ପାରିପାର୍ଶିକ ପରିବେଶ। ରାମ ଭକ୍ତଙ୍କ ପାଇଁ ଓଡିଶାର ଆଉ ଏକ ସୁନ୍ଦର ସ୍ଥାନ l ଏଠାରେ ଆଗାମୀ ଦିନରେ ରୋପ ୱେ ଆଦିର ବ୍ୟବସ୍ଥା କରାଯାଉଥିବା ଜଣାପଡିଛି। ତେବେ ନିଶ୍ଚିତ ଓଡ଼ିଶାର ନୟାଗଡ଼ରେ ଥିବା ଏହି ରାମ ମନ୍ଦିରକୁ ନିଶ୍ଚିତ ରଥରେ ବୁଲିଯାଆନ୍ତୁ।

ଅଧିକ ପଢ଼ନ୍ତୁ ଧର୍ମ ଓ ସଂସ୍କୃତି ଖବର

Argus English | argus english | Odisha Latest News, Breaking News, Trending News, Live TV