ଅର୍ଗସ ବ୍ୟୁରୋ : ପୁଣି ଚର୍ଚ୍ଚାରେ ରାୟଗଡାର ଟିକିରି । ୨୦୧୩ରେ ଟିକିରି ଅଞ୍ଚଳରେ ଇତିଶ୍ରୀଙ୍କୁ ପୋଡି ମାରିଦେଇଥିଲେ ଜହ୍ଲାଦ, ଆଉ ତାର ୧୧ ବର୍ଷ ପରେ ଟିକିରର ଝିଅ ଲକ୍ଷ୍ମୀ ମାଝିଙ୍କୁ ନିଆଁ ଲଗାଇ ମାରିଦେଲେ ପିଶାଚ । ଚନ୍ଦ୍ରପୁର ମା' ଗୃହରେ କାମ କରୁଥିବା ଦିବ୍ୟାଙ୍ଗ ଆଦିବାସୀ ଯୁବତୀଙ୍କ ଦୁଷ୍କର୍ମ ପରେ ହତ୍ୟା ଅଭିଯୋଗକୁ ୭ ଦିନ ବିତିଲାଣି, ହେଲେ ପୋଲିସ ଚୁପ୍ ସରକାର ବି ଚୁପ୍ । ୨୧ ତାରିଖରେ ଚନ୍ଦ୍ରପୁର ହସପିଟାଲ ପରିସରରେ ଥିବା ପରିତ୍ୟକ୍ତ ଘରୁ ମିଳିଥିଲା ଲକ୍ଷ୍ମୀଙ୍କର ଅର୍ଦ୍ଧଦଗ୍ଧ ମୃତ ଶରୀରର । ଘର ଲୋକଙ୍କ ଅଭିଯୋଗ ରେପ ଆଣ୍ଡ ମର୍ଡର । ସନ୍ଦେହ ଘେରରେ ଆଲିସା ସଂସ୍ଥାର ପରିଚାଳକ ନରସିଂହ ମହାପାତ୍ର ।

ଅଧିକ ପଢନ୍ତୁ ଓଡ଼ିଶା ଖବର

ଲକ୍ଷ୍ମୀ ମାଝୀଙ୍କୁ ନ୍ୟାୟ ଦାବିରେ ସରକାରଙ୍କୁ ଘେରିଛି ବିଜେପି । ବିଜେପି ମହିଳା ମୋର୍ଚ୍ଚା ଗୁରୁବାର ରାୟଗଡାରେ ୬ ଘଣ୍ଟିଆ ବନ୍ଦ ପାଳନ କରିଛି । ପୂର୍ବରୁ ବୁଧବାର ଲକ୍ଷ୍ମୀଙ୍କ ପରିବାରକୁ ଭେଟିଥିଲା ବିଜେପି ମହିଳା ମୋର୍ଚ୍ଚାର ଫ୍ୟାକଟ ଫାଇଣ୍ଡିଂ ଟିମ୍ । ବିଜେପି ପୋଲିସର ପାରିବାପଣିଆ ଉପରେ ପ୍ରଶ୍ନ ଉଠାଇବା ସହ ସିବିଆଇ ତଦନ୍ତ ଦାବି କରିଛି । ସେହିଭଳି ଏଇ ଘଟଣାକୁ ନେଇ ପୁରା ଅଞ୍ଚଳରେ ଆଦିବାସୀଙ୍କ ଭିତରେ ଅସନ୍ତୋଷ ତେଜୁଛି ।

ସେପଟେ ଆଇନମନ୍ତ୍ର ଜଗନ୍ନାଥ ସାରକା ତଦନ୍ତ ଚାଲିଥିବା କହିଥିବା ବେଳେ ପୋଲିସ କହିଛି ଏସଆଇଟି ଟିମ୍ ଗଠନ ହୋଇଛି । ୭ ଦିନ ହେଲା କାହିଁକି ଚୁପ୍ ପୋଲିସ, ହସପିଟାଲ ପରିସରରେ ଜାଳିଦେଲେ, କେହି କେମିତି ଜାଣିପାରିଲେନି, କାହାକୁ ଘଣ୍ଟ ଘୋଡାଉଛି ପୋଲିସ । ଅପରାଧୀଙ୍କୁ ସୁରକ୍ଷା ଦିଆଯାଉଥିବାରୁ ମହିଳା ନିର୍ଯ୍ୟାତନାରେ ଓଡ଼ିଶାରେ ଦଣ୍ଡବିଧାନ ହାର ମାତ୍ର ୯.୨ ପ୍ରତିଶତ ।

Argus English | argus english | Odisha Latest News, Breaking News, Trending News, Live TV