ଅର୍ଗସ ବ୍ୟୁରୋ : ବିପଦ ସଙ୍କୁଳ ଅବସ୍ଥାରେ ପୁରୀର ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଐତିହ୍ୟ ଭବନ । ୧୦୬ ବର୍ଷ ତଳର ଏହି କୋଠା ସଂଗ୍ରହାଳୟର ରୂପ ନେଇଥିଲେ ହିଁ ଏବେ ଛାତ ଓ କାନ୍ଥ ଫାଟି ଆଁ ହୋଇପଡ଼ିଛି । ନିର୍ମାଣ ହୋଇଥିବା ଷ୍ଟ୍ରକ୍ଚର ବି ଫାଟି ଗଲାଣି । ଦ୍ବିତୀୟ ମହଲାରେ ଏଭଳି ଦୟନୀୟ ଚିତ୍ର ସାମ୍ନାକୁ ଆସିଛି । ଗୁରୁତ୍ବପୂର୍ଣ୍ଣ କଥା ହେଉଛି, ପୂର୍ବରୁ କେବଳ ଛାତରେ ଏହି ଫାଟ ସୃଷ୍ଟି ହୋଇଥିବା ବେଳେ ଏବେ ଏହାର ପ୍ରଭାବରେ କାନ୍ଥ ଓ ଷ୍ଟ୍ରକ୍ଚର ଫାଟି ଧୀରେ ଧୀରେ ମେଲିବାରେ ଲାଗିଛି । ଫଳରେ ନେତାଜୀଙ୍କ ଫରୱାର୍ଡ ବ୍ଲକର ଗୁପ୍ତ ବୈଠକର ମୂକସାକ୍ଷୀ ସାଜିଥିବା ଏହି କୋଠା ପ୍ରତି ବିପଦ ସୃଷ୍ଟି ହୋଇଛି ।

“ସୁଭାଷ ଚନ୍ଦ୍ର ବୋଷଙ୍କ ବାପା ଜାନକୀନାଥ ବୋଷ କଟକରେ ରହୁଥିବା ବେଳେ ୧୯୧୬ ମସିହାରେ ଶାରଦା ଦେବୀ ରୋଡର ଲିଜ୍ ସୂତ୍ରରେ ୦.୪୩୪ ଏକର ଜମି ପାଇଥିଲେ । ତେଣୁ ଏଠାରେ ମଧ୍ୟ କଟକ ସଦୃଶ ଦୁଇ ମହଲା କୋଠା ନିର୍ମାଣ କରିଥିଲେ । ପୁରୀ ଆସିଲେ ଜାନକୀନାଥଙ୍କ ସମଗ୍ର ପରିବାର ସେଠାରେ ଅବସ୍ଥାନ କରୁଥିଲେ । ୧୯୩୮ରେ ଜାନକୀନାଥ ବୋଷଙ୍କ ମୃତ୍ୟୁ ପରେ ନେତାଜୀଙ୍କ ନାମରେ ଏହା ୧୯୪୬ ମସିହାରେ ପୁଣି ଲିଜ୍ ଦିଆଯାଇଥିଲା ।

ଏହାର ପୁନରୁଦ୍ଧାର ଦାୟିତ୍ଵ ଦିଆଯିବା ସହ ପାଖାପାଖି ୪କୋଟି ଟଙ୍କାରେ ହୋଇଥିଲା ପୁନରୁଦ୍ଧାର କାର୍ଯ୍ୟ । ଐତିହ୍ୟ କୋଠା ପାଲଟିଥିଲା ସ୍ମୃତି ସଂଗ୍ରହାଳୟ । ଗ୍ୟାଲେରୀ ନିର୍ମାଣ ସହ ଲାଗିଥିଲା ୱାଟର ଫାଉଣ୍ଟେନ୍ । ତେବେ ରକ୍ଷଣାବେକ୍ଷଣ ଅଭାବ ଓ ଫନି ବାତ୍ୟା ପରେ ଧିରେ ଧିରେ ଏହି କୋଠା ଏବେ ବିପଦ ସଙ୍କୁଳ ଅବସ୍ଥାରେ । ୪ କୋଟିରେ ପୁନରୁଦ୍ଧାର ହୋଇଥିବା ଏହି କୋଠାକୁ ଦେଖିଲେ ଲାଗୁନି ଏହାର ନିକଟ ଅତୀତରେ କୌଣସି ପୁନରୁଦ୍ଧାର କାର୍ଯ୍ୟ ହୋଇଛି ବୋଲି ।

ଗତବର୍ଷ ନେତାଜୀ ଜୟନ୍ତୀ ପାଳନ ପାଳନ ସମୟରେ ଏନେଇ ସ୍ବର ଉତ୍ତୋଳନ ମଧ୍ୟ ହୋଇଥିଲା । ଆଉ ଦିନ କେଇଟା ପରେ ଅର୍ଥାତ୍ ଜାନୁଆରୀ ୨୩ ତାରିଖରେ ପୁଣି ନେତାଜୀ ଜୟନ୍ତୀ ପାଳନ କରାଯିବ । ହେଲେ କୋଠାର ସ୍ଥିତି ଯଥା ପୂର୍ବ ତଥା ପର । ସେପଟେ ଖବର ପ୍ରସାରଣ ପରେ ଏହାର ପୁନରୁଦ୍ଧାର ପାଇଁ ୬ କୋଟି ୭୪ ଲକ୍ଷ ଟଙ୍କାର ହୋଇଥିଲା ବ୍ୟୟ ଅଟକଳ । ହେଲେ ଏସବୁ ଏବେ କେବଳ କାଗଜ କଲମରେ ସୀମିତ । ନଜର ପକାନ୍ତୁ ଏ କୋଠା ଉପରେ । ଗତବର୍ଷ ଯାହା ଥିଲି ସ୍ଥିତି ଏବେ ସମାନ ପରିସ୍ଥିତି । ରଙ୍ଗ ଛାଡ଼ିଛି, ୱାଟର ଫାଉଣ୍ଟେନ କାମ କରୁନି ।

ଅଧିକ ପଢନ୍ତୁ ଓଡ଼ିଶା ଖବର

କୋଠାର ବିଭିନ୍ନ ସ୍ଥାନରେ ଫାଟ ରହିବା ସହ ଅନେକ ସ୍ଥାନରୁ ବର୍ଷା ହେଲେ ପାଣି ଗଳୁଛି । ଖାଲି ସେତିକି ନୁହେଁ । ଇଲେକ୍ଟ୍ରିକ ବୋର୍ଡ ଠାରୁ ଆରମ୍ଭ କରି ଏସି ପର୍ଯ୍ୟନ୍ତ ଅଚଳ । ଦିନଟିଏ ବି ଖୋଲା ହେଉନାହିଁ ଲାଇବ୍ରେରୀ । ଆଉ ପ୍ରବେଶ ପଥରେ ଥିବା ଲୁହା ଗେଟରେ କଳଙ୍କି ଲାଗିବା ସହ ଭାଙ୍ଗି ରୁଜିଗଲାଣି । ତେବେ ନେତାଜୀଙ୍କ ପ୍ରତି ଦରଦ ନଥିବା ସରକାର ଓ ଜିଲ୍ଲା ପ୍ରଶାସନ ଜୟନ୍ତୀ ପାଳନ କରିବା ପୂର୍ବ ଏହି ସ୍ମୃତି ସଂଗ୍ରହାଳୟର ପୁନରୁଦ୍ଧାର ପାଇଁ ଅଣ୍ଟା ଭିଡ଼ିବା ଉଚିତ୍ ନୁହେଁ କି ?

Argus English: Odisha's Top English News Platform | Latest Breaking News, Politics, Sports & Live TV