କୋରାପୁଟ: ଦିନେ ରାସ୍ତା କଡେ ପଡି କୁଆଁ କୁଆଁ କାନ୍ଦୁଥିଲେ । ଛୁଆଟି କେମିତି ବଞ୍ଚି ଯାଉ ଭାବି କୋଳେଇ ନେଇଥିଲା ଏହି ଶିଶୁ ଯତ୍ନ କେନ୍ଦ୍ର । ବୟସ ଥିଲା ମାତ୍ର 13 ମାସ । ପ୍ରାୟ ବର୍ଷେ ଏଇଠି ରହିଲେ । ସାଙ୍ଗସାଥୀ ବନାଇଲେ । ହେଲେ ଆଦିବାସୀ ଇଲାକାର ଏହି କୁନି ଝିଅଟି ଯେ ଆମେରିକା ଯିବ ସେଠି ପାଠ ପଢିବ ସମସ୍ତଙ୍କ ପାଇଁ ଥିଲା ସ୍ୱପ୍ନ । ଏବେ କାବ୍ୟା ଆଉ ଓଡିଆ ବୁଝି ପାରୁନି । ଅନର୍ଗଳ ଇଂରାଜୀ କହୁଛି । ଆଉ ତା ଇଂରାଜୀ ଶୁଣି ସମସ୍ତଙ୍କୁ ଭାରି ଖୁସି ଲାଗୁଛି ।

ଏ ହେଉଛି କୋରାପୁଟ ଜିଲ୍ଲା ଦଶମନ୍ତପୁର ବ୍ଲକ ସଦରମହକୁମା ସ୍ଥିତ ପୋଷ୍ୟ ସନ୍ତାନ କେନ୍ଦ୍ରର ଦୃଶ୍ୟ। ପୋଷ୍ୟ ଅନୁଷ୍ଠାନର ସଂପାଦକ ଦେବେନ୍ଦ୍ର କୁମାର ବେହେରା ଦେଇ ଥିବା ସୂଚନା ଅନୁସାରେ ଗତ ୨୦୧୬ ମସିହାରେ କାବ୍ୟାକୁ ମାଲକାନଗିରି ଜିଲ୍ଲାରୁ ଉଦ୍ଧାର କରାଯାଇ ଥିଲା । ତାଙ୍କୁ ଶିଶୁ ଯତ୍ନ କେନ୍ଦ୍ରରେ ରଖି ଏକ ବର୍ଷ ଲାଳନ ପାଳନ କରାଯାଇ ଥିଲା ।

ସେତିକି ବେଳେ ଆମେରିକାରେ ରହୁଥିବା ଏହି ଭାରତୀୟ ଦମ୍ପତ୍ତି ପୋଷ୍ୟ ସନ୍ତାନ ପାଇଁ ଅନଲାଇନରେ ଆବେଦନ କରିଥିଲେ । ତାଙ୍କର ଦୁଇଟି ପୁତ୍ର ସନ୍ତାନ ଥିଲେ ମଧ୍ୟ ଝିଅର ଆବଶ୍ୟକତା ଥିବାରୁ କୋରାପୁଟ ଦଶମନ୍ତପୁର ଠାରେ ଥିବା ଶିଶୁ ଯତ୍ନ କେନ୍ଦ୍ରକୁ ଆସିଥିଲେ । କାବ୍ୟା ତାଙ୍କୁ ଭାରି ଭଲ ଲାଗିଥିଲା । ଝିଅକୁ ସରକାରୀ ଆଇନ୍ ଅନୁସାରେ କାଗଜପତ୍ର କରି ନେଇଥିଲେ । ଏହି ଦମ୍ପତିଙ୍କ ମଧ୍ୟରୁ ସ୍ବାମୀ ଏକ କମ୍ପାନୀର ଅଧ୍ୟକ୍ଷ ଥିବାବେଳେ ସ୍ତ୍ରୀ ମଧ୍ୟ ଆମେରିକାର ଏକ କଲେଜରେ ଅଧ୍ୟକ୍ଷା ଥିବା ଜଣାପଡିଛି ।

ତେବେ 7 ବର୍ଷ ପରେ ଝିଅକୁ ଧରି ପୋଷ୍ୟ ସନ୍ତାନ କେନ୍ଦ୍ରକୁ ବୁଲିବାକୁ ଆସିଛନ୍ତି ଏହି ଦମ୍ପତ୍ତି । ବର୍ତ୍ତମାନ କାବ୍ୟା ଦ୍ୱିତୀୟ ଶ୍ରେଣୀରେ ପଢୁଛନ୍ତି । ସେ କାହାରିକୁ ଜାଣିପାରୁନଥିଲେ ବି ଶିଶୁ ଯତ୍ନ କେନ୍ଦ୍ରର କର୍ମଚାରୀ ତାକୁ ଦେଖି ଭାବବିହ୍ୱଳ ହୋଇପଡିଛନ୍ତି । କେବେ ସ୍ୱପ୍ନରେ ବି ଭାବିନଥିଲୁ ଏହି ଆଦିବାସୀ ଝିଅର ଜୀବନ ଏତେ ଉଜ୍ଜ୍ୱଳ ବୋଲି କହିଛନ୍ତି କର୍ମଚାରୀମାନେ ।
ସେପଟେ କୁନି ଝିଅ ଆମେରିକାକୁ ସାଙ୍ଗରେ ଆଣିଥିବା ଖାତା, ପେନ୍, ଖେଳ ସାମଗ୍ରୀ ଏଟାକାର ପିଲାଙ୍କୁ ବାଣ୍ଟିଛନ୍ତି । କିଛି ସମୟ ତାଙ୍କ ସହ ହସ ଖୁସି ମଜା ମସ୍ତି କରିଛନ୍ତି ।

Argus English: Odisha's Top English News Platform | Latest Breaking News, Politics, Sports & Live TV